GM Uzbekistan kompaniyasi 8-oktabr kuni Moskvada Uz-Daewoo o‘rniga kelgan yangi Ravon brendi taqdimotini o‘tkazdi, deya xabar bermoqda “Gazeta.uz”. Endi o‘zbekistonlik avtomobil ishlab chiqaruvchining mahsulotlari xorijda shu brend ostida sotiladi.
“O‘zavtosanoat” kompaniyasi boshqaruv raisi o‘rinbosari Tohirjon Jalilov so‘zlariga ko‘ra, Ravon nomi o‘zbekcha ma’nosidan tashqari, qisqartma so‘z sifatida brend avtomobillari xususiyatlarini belgilaydi: Reliable Active Vehicle On Road.
Yangilangan eksteryer va interyerli Ravon Matiz ixcham shahar avtomobili taqdim etildi. U birinchi marta xavfsizlik yostig‘i, ABS va immobilayzer bilan jihozlandi.
Ravon Gentra’da esa ergonomika yaxshilandi, charmdan ishlangan rul, salondagi yorug‘lik nazorati va ko‘p funksiyali displey paydo bo‘ldi. GM Uzbekistan Gentra’ga, keyinroq boshqa avtomobillarga ham “ERA-GLONASS” navigatsiya tizimini o‘rnatish ustida ishlamoqda.
Kelasi yildan Rossiyada Ravon R2 (Spark analogi) va Ravon R4 (Cobalt) sotila boshlaydi. Birinchi modelda yangi dvigatel, avtomatik uzatish qutisi, asbob-uskunalar paneli va audiotizim paydo bo‘ladi. Ikkinchisida esa tashqi ko‘rinish va salon o‘zgarishlarga uchradi.
Eng kutilgan yangi model T250 bazasida chiqariladigan Ravon Nexia’dir. Avtomobil mutlaqo yangi dizaynga ega bo‘lgan va xavfsizlik bo‘yicha qator o‘zgarishlarga uchragan. Bular yo‘nalishga chidamlilik va shinalardagi bosimni nazorat qilish tizimlari, haydovchi va yo‘lovchilar uchun qo‘shimcha himoya, piyodalar xavfsizligi talablariga javob beruvchi old bamperdir. Model, shuningdek, avtomatik uzatish qutisiga ega.
Avvalroq ijtimoiy tarmoqlarda Nexia, Gentra (Lacetti 2) vaSpark’ning Ravon brendi bilan bezaklangan suratlari paydo bo‘lgandi.
Internetda va Rossiya federal kanallari efirida Ravon brendi reklamasiga bag‘ishlangan rolik paydo bo‘lgan, shuningdek, mirwelcome.ru manzilida brend tashviqotiga mo‘ljallangan sayt ishga tushgan.
Izoh (0)