Texas shtatining (AQSh) Irving shahrida joylashgan maktabning 9-sinf o‘quvchisi, 14 yoshli Ahmad Muhammad o‘qituvchilarining shikoyatidan so‘ng go‘yoki qo‘lbola bomba tayyorlagani uchun politsiya bo‘limiga olib ketildi. Ahmadning aytishicha, u bor-yo‘g‘i turli buyumlarni yasashni yaxshi ko‘radi va o‘zi tayyorlagan qo‘lbola soatni o‘qituvchilariga ko‘rsatish uchun maktabiga keltirgan. Bu haqda “Tjournal.ru” xabar bermoqda.
Musodara etilgan “bomba” o‘quvchiga qaytarib berilmagan. Politsiya yasalgan buyum xavfsiz ekanligini tan olgan bo‘lsa-da, uning atigi soat ekanligiga shubha bilan qaradi. Ahmad uch kunga mashg‘ulotlardan chetlatildi. Politsiya hozir ham mazkur hodisani o‘rganish bilan ovora.
Bu voqea Amerikada hech kimni befarq qoldirmadi: AQSh prezidenti Barak Obama Ahmadni “qoyilmaqom soat” yasagani uchun maqtab, uni Oq uyga olib kelishini so‘ragan bo‘lsa, Facebook rahbari Mark Sukerberg “Yaratishga bo‘lgan ishtiyoq va buni amalga oshirish qobiliyati tahsinga sazovor, aslo qamoqqa olishga emas. Ahmad, agar Facebook ofisiga kelishni istasang, seni mamnuniyat bilan qarshi olardim”, deya o‘quvchini qo‘llab-quvvatlagan.
Izoh (0)