Ispaniya poytaxti Madrid shahrida o‘tkazilgan IAAF World Challenge turnirida o‘zbekistonlik Svetlana Radzivil 1,94 m balandlikni zabt etib, kumush medal va 2016-yil Rio-de-Janeyro shahrida o‘tkaziladigan XXXI yozgi Olimpiada o‘yinlari yo‘llanmasiga ega bo‘ldi. Bu haqda O‘zbekiston Milliy olimpiya qo‘mitasi xabar beradi.
Eslatib o‘tamiz, Svetlana Radzivil 2008-yili Pekin (Xitoy)da hamda 2012-yili London (Buyuk Britaniya)da bo‘lib o‘tgan Olimpiada o‘yinlarida ishtirok etgan. Chin mamlakatida o‘tkazilgan XXIX yozgi Olimpiada o‘yinlarida 1,89 m natija bilan 18-o‘rinni egallagan bo‘lsa, 2012-yili Londonda o‘tkazilgan XXX yozgi Olimpiada o‘yinlarida 1,97 m balandlikni zabt etib, 7-o‘rinni qo‘lga kiritgan.
Demak, Svetlana Radzivil uchinchi bor Olimpiada o‘yinlarida O‘zbekiston sharafini himoya qilish baxtiga muyassar bo‘ldi.
Shu tariqa O‘zbekiston yengil atletikachilari XXXI Olimpiada o‘yinlarining ikkinchi yo‘llanmasiga ega bo‘ldi. Bunga qadar marafonchi Sitora Hamidova Rio—2016 yo‘llanmasiga ega bo‘lgan edi.
Izoh: Oldinroq Svetlana Radzivil Madriddagi musobaqada bronza medalini qo‘lga kiritganligi to‘g‘risida xabar berilgan edi. O‘zbekiston Milliy olimpiya qo‘mitasi aniqlik kiritishicha, Radzivil sent-lyusiyalik Levern Spenser bilan bir xil natija qayd etgan va ikkala sportchi ham kumush medali bilan taqdirlangan.
Izoh (0)