Malayziyaning “T-Tim” futbol klubi nigeriyalik himoyachisi Devid Oniya o‘rtoqlik uchrashuvi vaqtida xushini yo‘qotganidan so‘ng, hayotdan ko‘z yumdi. Bu haqda “TASS” xabar bermoqda.
Futbolchi Kota-Baru shahrida “Kelantan” jamoasiga qarshi uchrashuvning 3-daqiqasidayoq xushini yo‘qotgan. U shu zahoti kasalxonaga yuborilgan, biroq shifokorlar uning hayotini saqlab qola olishmagan.
“U yurak xurujini boshdan kechirdi, agar tez yordam mashinasi haydovchisi o‘z o‘rnida bo‘lganida edi, hammasi umuman boshqacha bo‘lardi. Oniya xushini yo‘qotgan vaqtda haydovchi tribunada bo‘lgan”, - dedi “T-Tim” prezidenti Zayn.
Futbolchining kasalxonada vafot etgani ma’lum bo‘lganidan so‘ng, o‘yin 60-daqiqada to‘xtatilgan. Ma’lumot uchun, Devid Oniya bir necha yil davomida O‘zbekistonning “Dinamo” (Samarqand) va “Buxoro” jamoalarida to‘p surgandi.
Izoh (0)