Afrika qit’asida joylashgan Burundi davlatida harbiy davlat to‘ntarishiga urinish bostirildi. Bu haqda mamlakat armiyasi generali Prim Niyongaboga asoslanib Reuters xabar bermoqda.
Ayni paytda Tanzaniyada bo‘lib o‘tayotgan Afrika davlatlari rahbarlari sammitida ishtirok etayotgan Burundi prezidenti Pyer Nkurunziza o‘zining Twitter’dagi sahifasida mamlakat aholisini xotirjamlikka chaqirib post joylashtirgan.
Qayd etilishicha, 13-maydan 14-mayga o‘tar kechasi politsiya kiyimidagi noma’lum shaxslar ikkita xususiy radiostanisya va telekanalni egallab, general Godfrua Niyombare nomidan Nkurunziza uchinchi marta prezidentlik saylovida ishtirok etish istagini bildirib, Konstitutsiyani buzgani uchun hokimiyatdan chetlatilishi haqidagi murojaatni o‘qib eshittirgan.
Nkurunziza 26-apel kuni prezident saylovida qatnashish istagini e’lon qilgach, mamlakatda tez orada norozilik namoyishlari boshlanib ketgan. Politsiya qurol ishlatgan, 10 kishi halok bo‘lgan va 100 ga yaqini jarohat olgan. 5-may kuni Konstitutsiyaviy sud prezidentning o‘z nomzodini ilgari surish huquqini tasdiqlagan.
1993-yildan 2005-yilgacha Burundida tutsi va xutu etnik guruhlari o‘rtasida fuqarolik urushi davom etgan. Mojaro parlament saylovidan keyin boshlanib ketgan. 2005-yil avgustida Pyer Nkurunziza prezident lavozimiga kirishgachgina urush rasman yakunlangan. Mojaro davomida 300 mingdan ortiq kishi halok bo‘lgan.
Izoh (0)