Sibirda, Rossiyaning Xanti-Mansilar muxtor okrugida joylashgan Sovetskiy nomli kichik shaharda keksa musulmon ayol − Fanziya Nigmatjanova olti yil davomida masjid barpo etdi, deb xabar bermoqda “Musulmanka” jurnali.
Masjid qurilishi boshlanganda ayolning yoshi 60 da bo‘lgan, hozir esa uning yoshi 67 da. Masjid qurilishi uchun hujjat to‘plashni Fanziya Nigmatjanova 2006-yilda boshlagan. Uning so‘zlariga ko‘ra, qurilish uchun “Gazprom” 800 ming rubl, “Severavtodor” 300 ming rubl, “Lukoyl” 1 200 000 rubl miqdorida yordam ko‘rsatgan.
Fanziya Nigmatjanovaning qayd etishicha, qurilish davridagi barcha tashkiliy ishlardan tashqari, jismoniy ishlarga ham faol aralashib yurgan. Boshlanishida yordam beruvchilar unchalik ko‘p bo‘lmagan, keyin esa ularning soni ortib borgan. Jumladan, u masjid qurilishiga beminnat yordam ko‘rsatgan tojik quruvchilarini, shuningdek, yordamini ayamagan rus mutaxassislarini alohida e’tirof etgan. Ayolning ta’kidlashicha, Tatariston prezidenti Rustam Minnixanovning ham hissasi qo‘shilgan.
Masjid 2014-yilda ochilgan bo‘lib, qo‘shimcha qismlar qurilishi davom etmoqda. 67 yoshga kirganiga qaramay, g‘ayratga to‘lgan ayol esa masjidni to‘liq qurib bitkazish uchun yordam beruvchilar topilishiga umid bildirgan.
Izoh (0)