Eron va xalqaro vositachilar “oltiligi” (AQSh, Rossiya, Buyuk Britaniya, Fransiya, Xitoy va Germaniya) Eron yadro dasturi bo‘yicha siyosiy kelishuvga erishdi. Bu haqda 2-aprel, payshanba kuni Lozannadagi matbuot anjumanida Yevroittifoqning tashqi ishlar va xavfsizlik siyosati bo‘yicha vakili Federika Mogerini ma’lum qildi, deb yozadi “RIA Novosti”.
Uning aytishicha, bitimni tayyorlash jarayoni 30-iyungacha yakunlanishi kerak. Shu bilan birga, u Eronning uranni boyitish bo‘yicha imkoniyati cheklanishini, zaxiralari esa mamlakatdan chiqarib ketilishini ta’kidladi.
Buyuk Britaniya TIV rahbari Filipp Hammond bitim Tehronning yadro dasturi tinchlik xususiyatiga ega bo‘lishi kafolatini ta’minlashini aytdi. Shuningdek, uning so‘zlariga ko‘ra, bitimlarga rioya qilinsa, Eronga qarshi sanksiyalar ancha kuchsizlantiriladi.
Eron TIV rahbari Javad Zarif bitim tuzilguniga qadar Tehronning “oltilik” oldida hech qanday majburiyatlari bo‘lmasligini qayd etdi.
AQSh Davlat departamenti bayonotida aytilishicha, Eron yadro dasturi ustidan nazorat turli yo‘nalishlar bo‘yicha 10 yildan 25 yilgacha davom etadi.
Izoh (0)