Vashingtondagi Pyu tadqiqot markazi xodimlari hozirda son jihatidan dunyoda eng ko‘pchilik bo‘lgan xristianlarga 2050-yilda musulmonlar deyarli yetib olishini hisoblab chiqdi, deb xabar bermoqda “TASS”. 2070-yilga borib esa musulmonlar ko‘pchilikni tashkil etadi.
Hisobotga ko‘ra, 2010-yilda xristianlarning umumiy soni 2,2 milliard kishi bo‘lgan, bu dunyo aholisining 31 foizi demakdir. 1,6 milliard musulmon esa jahon aholisining 23 foizini tashkil etgan.
Biroq musulmonlar eng ko‘p oshib borayotgan aholi toifasi hisoblanadi. 2050-yilga borib ularning umumiy soni hozirgidan 73 foizga, xristianlarniki esa 35 foizga oshadi. Natijada 9,3 milliardlik dunyo aholisidan 2,8 milliardi musulmonlar, 2,9 milliardi xristianlar bo‘ladi. Xristianlarning 40 foizi Afrikada, Sahroyi Kabirdan janubda yashaydi.
Yevropada musulmonlar aholining 10 foizdan ortig‘ini tashkil etadi. Buyuk Britaniya, Fransiya va Niderlandiya kabi davlatlarda xristianlar ko‘pchilik bo‘lmay qoladi. AQShda islom xristianlikdan keyin ikkinchi o‘ringa chiqadi, ya’ni yahudiylikdan o‘tib ketadi. Amerikada xristianlar aholining 3/4 qismini emas, 2/3 qismini tashkil eta boshlaydi.
Tadqiqotchilar buddaviylarning soni oshmasligini taxmin qilmoqda. Buddaviylarda har bir ayolga 1,6 bola to‘g‘ri kelsa, musulmonlarda bu ko‘rsatkich 3,1 ga, xristianlarda esa 2,7 ga teng bo‘ladi. Qiziqarli tomoni, dunyo bo‘ylab ateistlar, agnostiklar va o‘zini hech qanday dinga mansub emas deb hisoblovchilar soni kamayadi.
Izoh (0)