“Daryo” Amerikada: Plantronics’ning Meksikadagi zavodiga tashrif

Fevral oyining boshlari edi. Telefonim “bip” etdi. Qarasam, maktub kelibdi, Plantronics kompaniyasidan. AQShga, kompaniya ofisi va zavodini tomosha qilishga chaqirishibdi.

Kaminai kamtarin, “Daryo” nashri rahbari Farhod Fayzullayevning Amerikaga tashrifi shu tariqa boshlandi.

Bu inson uchun kichik qadam, insoniyat uchun ulkan sakrash

Shu sababli Plantronics o‘z tarixi va yutuqlari bilan faxrlanadi. Kompaniya hali-hanuz AQSh kosmik agentligi — NASA bilan hamkorlik qiladi. Ammo hamkorlik aynan nimadan iborat ekanligini aytishmadi — sir ekan :-)

Kompaniya bosh ofisi Kaliforniyadagi Kremniy vodiysida joylashgan bo‘lib, ishlab chiqarish esa Meksika, Xitoy, Hindiston kabi davlatlarda amalga oshiriladi.

Shunday qilib, 16-mart kuni kechqurun Koreyaning Asiana Airlines aviakompaniyasi samolyoti bilan yo‘lga tushdim. Manzil: Los-Anjeles.

Los-Anjeles AQSh g‘arbiy sohilidagi eng katta shahar bo‘lib, Amerikani Osiyo va Tinch okeani mintaqasi bilan bog‘lovchi asosiy aviatugun hisoblanadi.

Yo‘l ancha olis: Asiana meni avval Janubiy Koreyaga eltdi. Seulning Inchxon aeroportida 6 soatlik tanaffusdan so‘ng dunyodagi eng katta yo‘lovchi samolyoti — Airbus A380’ning ikkinchi qavatida Los-Anjelesga yo‘l oldik.

Ta’kidlash joiz, Seul aeroporti juda zamonaviy bo‘lib, 10 yildan buyon dunyoning eng qulay aeroporti deb tan olinib kelinar ekan.

Soat ertalabki 10 da samolyot Los-Anjeles aeroportiga qo‘ndi va biz, Rossiya, Ozarbayjon, Qozog‘iston va Belorussiyadan kelgan hamkasblar bilan Meksika chegarasida joylashgan San-Diyego shahriga yo‘l oldik.

Kaliforniyada havo ochiq, iliq — 15—20 daraja ekan. Taxminan 1,5 soatlarda Chrysler mikroavtobusida mehmonxonaga yetib oldik.

AQSh shaharlararo yo‘llarida qiziq qoida bor ekan: yo‘lning chap bo‘lagi Carpool yoki High Occupancy Vehicle lane — ichida kamida ikki kishi bo‘lgan avtomobillar uchun mo‘ljallangan ekan. Ya’ni, mashinangizda o‘zingiz va ayolingiz bo‘lsa, bemalol o‘sha bo‘lakdan yurib ketaverasiz, bir kishi bor avtomobillar bu bo‘lakda harakatlanishi mumkin emas. Bunday bo‘lakdan asosiy maqsad — bitta avtomobildan ko‘p kishilar foydalanishini rag‘batlantirish.

Ertasiga ertalab San-Diyegodagi mehmonxonamizdan Meksikaga, Plantronics mahsulotlari ishlab chiqariladigan zavodga yo‘l oldik. San-Diyegodan Meksikaning Tixuana shahrida joylashgan zavodgacha avtomobil 40 daqiqa yurar ekan. Ammo o‘rtada davlatlar chegarasini kesib o‘tish kerak.

AQSh−Meksika chegarasiga yetib borgach, Meksika tomonida bir xonachaga kirdik. U yerda ikkita to‘ladan kelgan meksikalik ayol o‘tirardi. Biz hujjatlarimizni ularga topshirdik va ular pasportga “taq” etib muhr bosib berdi: Meksikaga marhamat!

Tixuana tabiati biznikiga o‘xshab ketadi: issiq, chang ko‘p, jigarrang tog‘lar, daraxtlar ham ko‘p emas. AQShga solishtirganda farq juda katta: mashinalar juda eski, yo‘llar g‘adir-budir, aholi uylari anchagina xarob.

Ammo Plantronics zavodi 2009-yili qayta ta’mirlangan, AQSh va jahon standartlariga moslashtirilgan zamonaviy hudud ekan. Zavod kiraverishida kompaniya mahsulotlari yasatib qo‘yilgan.

Borishimiz bilan bizni zavod mutasaddilari kutib oldi. Qisqa tanishuvdan so‘ng ular kompaniya tarixi va zavod haqida taqdimot o‘tkazib berishdi. Taqdimotda zavodda 2300 kishi mehnat qilishi, 40 yildan buyon faoliyat olib borishi haqida so‘z bordi. Zavodda kuniga 70 000 qurilma ishlab chiqarilishini aytib o‘tishdi.

Yana bir qiziq fakt: zavod tomiga 4300 dona quyosh paneli o‘rnatilgan bo‘lib, ular 1,1 Megavatt elekt quvvati ishlab chiqarar ekan. Bu miqdor zavodni deyarli to‘liq elektr energiyasi bilan ta’minlashga yetadi.

So‘ngra zavod bo‘ylab ekskursiya boshlandi. Biz birin-ketin zavodning barcha qismlari: ishlab chiqarish zonasi, ofislar, laboratoriyalardan tortib tayyor mahsulotlar omborxonasi va dam olish xonalarigacha aylanib chiqdik.

Ishlab chiqarish sexida har bir qatorga monitorlar o‘rnatilgan bo‘lib, ularda xodimlar samaradorligi, reja qay darajada bajarilayotgani aks etib turadi. Har bir qurilma tayyor bo‘lganidan keyin maxsus xodimlar ularni sinovdan o‘tkazadi.

Zavod hududida bir necha xil laboratoriyalar mavjud bo‘lib, ularda yangi mahsulotlar sinovdan o‘tkaziladi. Shunday laboratoriyalarning birida aks-sadosiz kamera ham bor ekan. Ichiga kirsangiz, shunchalik tinch-ki, birpas tursangiz, yuragingiz urishi va tomirlaringizdan qon oqishini eshitsangiz bo‘ladi. Zo‘r-a?

Kompaniya Amerikaniki bo‘la turib, nega zavodi Meksikada joylashganini so‘raganimizda ular ishchi kuchi arzonligini aytishdi. Zavodda ishchi xodim taxminan 300 dollar oylik olar ekan. Shuni alohida qayd etish joiz-ki, zavodda xodimlar uchun qulay sharoitlar yaratilgan. Masalan, bor-yo‘g‘i 1 dollarga tushlik qilish mumkin; bepul trenajyor zali, futbol va basketbol maydonlari faoliyat yuritmoqda. Ya’ni, sharoit chakki emas ;-)

AQSh bilan chegaradosh Tixuana shahri va uning atrofida juda ko‘p Amerika kompaniyalari o‘z zavodlarini joylashtirgan ekan.

Kunimizni Meksikada o‘tkazib, tushlikka qovurilgan sakkizoyoq va kaktus yeb, yana AQShga qaytdik.

Plantronics’ning Santa-Kruz shahridagi bosh ofisiga tashrif buyurish va kompaniya rahbari bilan uchrashishni rejalashtirib, yana yo‘lga otlandik...

Tashrifning keyingi qismi haqida “Daryo”da tez kunlarda :-)

Aytgancha...

Telefon: (+998-71) 200-33-55 (qo‘shimcha 201), (+998-94) 634-09-99. Faks: (+998-71) 200-33-77

Veb-sayt: http://followmars.com