Germaniya hukumati Facebook’da Ukraina bo‘yicha tutgan o‘rnini e’lon qildi

Germaniya hukumatining Facebook’dagi sahifasiga ijtimoiy tarmoq foydalanuvchilariga qarata Ukrainadagi voqealar yuzasidan murojaatnoma joylandi, deya xabar bermoqda “Liga. Novosti”.

“Ukrainada va uning Rossiya bilan chegarasida sodir bo‘layotgan hodisalar barchamizni xavotirga solmoqda… Ba’zi mushtariylar hukumatni Ukrainadagi nizolarda mustaqil ravishda harakat qilmayotganlikda ayblamoqda. Aslida Germaniya birinchi navbatda yevropacha me’yorlarga muvofiq hamda barcha xalqaro hamkorlar, jumladan AQSh bilan hamjihatlikda harakat qilmoqda”, — deyiladi xabarda.

Murojaatda, shuningdek, Rossiyaning harakatlari bunda katta rol o‘ynashi, chunki u mamlakat sharqidagi ayirmachilarga ta’sir o‘tkaza olishi ta’kidlanadi. Germaniya federal hukumati Ukraina hukumatining qonuniyligiga shubha qilish kerak emasligini ham qayd etdi. Bundan tashqari, u Ukrainaga o‘limga olib keluvchi qurollarni yetkazib bermasligini yana bir bor aytib o‘tdi.