Janubiy Koreyaning Incheon shahrida davom etayotgan Osiyo o‘yinlari — 2014 doirasidagi O‘zbekiston — Bangladesh uchrashuvi nihoyasiga yetdi. Ikkinchi turdan o‘rin olgan mazkur o‘yinda Mirjalol Qosimov boshchiligidagi O‘zbekiston terma jamoasi Bangladeshga qarshi maydonga tushib, yirik 3:0 hisobida g‘alaba qozondi. Bu haqda Uff.uz xabar bermoqda.
O‘yin to‘liq O‘zbekiston futbolchilari ustunligi ostida o‘tdi. Dastlabki daqiqalardanoq oldinga tashlangan O‘zbekiston terma jamoasi a’zolari raqib darvozasi oldida bir qator xavfli vaziyatlarni yaratdi.
Ushbu uchrashuvda Mirjalol Qosimov Gonkongga qarshi o‘yinga nisbatan o‘zgarishlar ham qilgan. Jumladan, avvalgi o‘yinda zaxiradan maydonga tushgan Vohid Shodiyev bugungi o‘yinni asosiy tarkibda boshladi. Aynan Shodiyev uchrashuvda hisobni ochganini ham alohida ta’kidlab o‘tish zarur. U 14-daqiqada darvozadan qaytgan to‘pga birinchi bo‘lib yetib kelib, aniq zarba bilan hisobni ochdi.
21-daqiqaga kelib, Shodiyev uchrashuvda dubl qayd etdi. U Sardor Rashidov tomonidan chap qanotdan oshirib berilgan uzatmani boshi bilan darvozaga yo‘llab, hisobni 2:0 ko‘rinishiga olib keldi. 34-daqiqaga kelib, Rashidovning o‘zi katta sahnaga chiqdi. Jamshid Iskandarov jarima zarbasini to‘g‘ri Rashidov oyog‘iga tashlab berdi. Sardor esa to‘pni to‘xtatmasdan chap oyoqda darvozaga yo‘lladi. Ushbu gol muxlislarga Zayniddin Zidanning “Real” tarkibida Chempionlar ligasi finalida kiritgan golini eslatib yuborgan bo‘lsa, ajab emas.
Birinchi bo‘limning o‘zida O‘zbekiston vakillarida gol kiritish uchun yana bir qator qulay vaziyatlar bo‘ldi. Ammo ular ushbu vaziyatlardan unumli foydalana olmadi. Ikkinchi bo‘lim ham to‘liq O‘zbekiston termasi ustunligi ostida o‘tdi. Bangladesh terma jamoasi a’zolari ahyon-ahyonda qarshi hujumda o‘z omadini sinab ko‘rishga harakat qildi. Ammo bu vaziyatlarda O‘zbekiston darvozaboni Eldor Suyunov nihoyatda ishonchli harakat qildi. 3:0 hisobi o‘yin oxiriga qadar o‘zgarmay qoldi.
Shu tariqa O‘zbekiston terma jamoasi guruhdagi ikkinchi o‘yinda yirik hisobda g‘alaba qozonib, birinchi o‘ringa ko‘tarilib oldi. Navbatdagi uchrashuvni O‘zbekiston terma jamoasi 22-sentabr kuni Afg‘oniston termasiga qarshi o‘tkazadi.
O‘zbekiston — Bangladesh: 3:0
Gollar: Vohid Shodiyev, 14, 21, Sardor Rashidov, 34
O‘zbekiston: Eldorbek Suyunov — Islom To‘xtaxo‘jayev, Yegor Krimets, Davron Hoshimov — Sardor Rashidov, Fozil Musayev, Vladimir Kozak, Farruh Sayfiyev, Jamshid Iskandarov — Igor Sergeyev, Vohid Shodiyev.
Bangladesh: Rayhon Hasan, Kastro Kumar, Yosin Xon, Jamol Bxuyon, Sohil Rana, Mamunul Islom, Vinsent Bizvas, Topu Barman, Rasul Mahmud, Chovduri Munna, Toklis Ahmad
Izoh (0)