1-oktabrdan O‘zbekiston poytaxti aholisi va tashkilotlar uchun markaziy isitish hamda issiq suv ta’minoti tarifi 7 foizga oshadi. Tariflar oshishi yoqilg‘i va materiallarning qimmatlashuvi bilan bog‘liq, deya xabar bermoqda Gazeta.uz “Toshissiqquvvati” korxonasining “Toshkent oqshomi” gazetasida e’lon qilingan ma’lumotiga tayanib.
Poytaxtda markaziy isitish uchun bir oylik tarif narxi turar joyning bir kvadrat metri uchun hozirgi 787,95 so‘mdan 844,67 so‘mgacha oshadi.
Issiq suv uchun yangi tarif hisoblagich bo‘lmagan taqdirda kishi boshiga 10570,54 so‘mni (hozir 9860,67 so‘m) va hisoblagich bilan bir kubometr uchun 2706,76 so‘mni (hozir 2524,99 so‘m) tashkil etadi.
Umumiy yotoqxonalarda istiqomat qiluvchilar kishi boshiga 7863,46 so‘m (hozir 7335,38 so‘m) to‘laydi.
Tashkilotlar uchun issiqlik energiyasi ulgurji tarifi bir Gkal uchun QQSsiz 47 487 so‘m (hozir 44 298 so‘m) QQS bilan esa bir Gkal uchun 56 984,4 so‘m (hozir 53 157,6 so‘m)dan iborat.
Issiq va sovuq suv uchun to‘lov hisoblagichi bo‘lmagan aholiga issiq va sovuq suv ta’minoti uchun belgilangan tariflarga 1,5 koeffitsiyentini qo‘llash orqali amalga oshiriladi.
Eslatib o‘tamiz, “Suvsoz” korxonasi 1-oktabrdan Toshkent aholisi uchun sovuq suv ta’minoti xizmati yangi tariflar bo‘yicha hisoblanishini ma’lum qilgan edi.
Issiq va sovuq suv narxlari bundan avval 1-aprelda oshgan edi.
Izoh (0)