O‘zbekistonda OIV infeksiyasi tarqalishiga qarshi kurashish bo‘yicha Davlat dasturi qabul qilindi

O‘zbekistonda 2014—2016-yillarda OIV infeksiyasi tarqalishiga qarshi kurashish sohasidagi Davlat dasturi (pdf) tasdiqlandi.

Davlat dasturi O‘zbekiston Respublikasi Vazirlar Mahkamasining 2014-yil 10-sentabrdagi qarori bilan tasdiqlandi.

Dastur “Odamning immunitet tanqisligi virusi keltirib chiqaradigan kasallik (OIV infeksiyasi) tarqalishiga qarshi kurashish to‘g‘risida”gi O‘zbekiston Respublikasi qonunini bajarish yuzasidan qabul qilindi.

Dastur doirasida O‘zbekiston 21 ta loyihani amalga oshirmoqchi. Xususan, OIV infeksiyasi tarqalishiga qarshi kurashish bo‘yicha profilaktika tadbirlari amalga oshiriladi, OITS bilan kurashish markazlari va davolash-profilaktika muassasalarining moddiy-texnik bazasi mustahkamlanadi, OIV infeksiyasi masalalari bo‘yicha mutaxassislarni muntazam va tizimli ravishda tayyorlash hamda ularning malakasini oshirish tashkil etiladi.

Tadbirlarni amalga oshirish uchun jami 12 255 million so‘m va 14 125,4 ming AQSh dollari sarflanadi. Shundan 12 036 million so‘m byudjet mablag‘lari, 219 million so‘m bajaruvchilar mablag‘lari va 14 125,4 ming dollar xalqaro tashkilotlar, moliya institutlari mablag‘lari va grantlar orqali qoplanadi.