G‘azo sektoridagi “Mudofaa chizig‘i” operatsiyasining qurbonlari soni 800 ga yetdi. BMT ma’lumotlariga ko‘ra, ulardan 500 nafari tinch aholi (kamida 170 bola, 86 nafar ayol)ni tashkil qiladi. Shuningdek, 5000 nafar falastinlik jarohat oldi, deb xabar berdi Euronews.
24-iyul kuni Bayt-Hanun shahridagi BMT maktabiga amalga oshirilgan aviahujum natijasida missiya xodimlarini ham qo‘shib hisoblaganda, kamida 17 kishi halok bo‘lgani, 200 ga yaqini jarohatlangani qayd etildi. Aviahujum kim tomonidan uyushtirilgani hozircha aniqlangan emas. Isroil armiyasi axborot xizmatida esa bu raketalar HAMAS guruhiga tegishli ekani haqida aytilgan.
BMT Yaqin sharq bo‘yicha agentligining falastinlik qochoqlarga yordam berish va ishlarni tashkillashtirish bo‘yicha vakili Kris Gunnesning aytishicha, BMT maktabida tinch aholi yashiringan. Urushayotgan tomonlar, ayniqsa, Isroil binoning aniq manzili haqida aniq ma’lumotga ega bo‘lgan.
Isroil mudofaa armiyasining axborot xizmati Bayt-Hanun tumanining bir necha kundan beri HAMAS jangarilariga qarshi kurash maydoniga aylanganini ta’kidlamoqda. Payshanba kuni u yerdan aholini ko‘chirish uchun to‘rt soatlik gumanitar koridor ochilgan.
Isroil Tashqi ishlar vazirligining vakili esa bu urushning HAMAS tashkiloti tomonidan tinch aholidan jonli qalqon sifatida foydalanilayotgani uchun davom etayotganini aytdi.
“Mudofaa chizig‘i” operatsiyasi davomida Isroil tomondan 32 nafar harbiy va ikki fuqaro halok bo‘ldi.
Izoh (0)