Formula-1 poygalarining afsonaviy qahramoni Mixael Shumaxer koma holatidan chiqdi. Bu haqda avtopoygachining menejeri Sabina Kem so‘zlariga tayanib Bild nashri xabar bergan.
Shumaxer vakilining ma’lum qilishicha, yetti karra jahon chempioni bo‘lgan avtopoygachi komadan chiqqach, Grenobldagi kasalxonadan reabilitatsion shifoxonaga ko‘chirilgan. Shuningdek, Mixael ovozni eshitmoqda, tanasiga tekkanda reaksiya bildirmoqda va qarindoshlarini tanimoqda, deydi Kem.
Sobiq sportchi 2013-yilning dekabrida Alp tog‘ida joylashgan tog‘ chang‘isi kurortida yuz bergan baxtsiz hodisa tufayli koma holatiga tushib qolgan edi. Mixael chang‘i uchayotib yiqilgan va boshi bilan toshga urilgan. Avtosport tarixidagi eng omadli poygachi bo‘lgan Shumaxer o‘shandan buyon behush yotgan edi; koma holatida payti u bir necha jarrohlik amaliyotini boshdan kechirgan.
Izoh (0)