Apple kompaniyasi Samsungga qarshi yangi da’vo ochib, uning to‘qqizta qurilmasi AQShda sotilishi taqiqlanishini talab qilmoqda. Bu haqda Mail.ru xabar berdi.
Huquqshunoslarning ta’kidlashicha, Apple’ning bunday taqiqqa erishishi qiyin bo‘ladi. Gap shundaki yangi ish sudya Lyusi Kox tomonidan ko‘rib chiqiladi, u Apple’ning 2012-yildagi shunga o‘xshash murojaatini ikki marta qaytargan edi. Agarda, Apple bunday taqiqqa erishsa ham, bu Samsung’ga qimmatga tushmaydi, chunki “stop-list”ga anchagina eski qurilmalar kiritilgan (Galaxy S4 va Galaxy S5 flagmanlari u yerda yo‘q).
Nashrning qayd etishicha, Samsung ham Apple smartfonlari sotuvining man qilinishi haqida so‘rov berishi mumkin, oxirgi ishda u o‘z patentlaridan bittasi buzilganini isbotlagan edi.
2-may kuni AQSh Federal maslahatchilar sudi Apple va Samsung kompaniyalarining bir-biriga qarshi patent da’volari bo‘yicha qaror chiqardi. Unga ko‘ra, ikkita patentni ko‘chirgan Samsung 119,6 million dollar, o‘z raqibining bitta patentini o‘g‘irlagan Apple esa 158,4 ming dollar to‘laydi.
Izoh (0)