AQShning sobiq davlat kotibi Xillari Klinton Nevada shtatining Las-Vegas shahridagi Mandalay Bay mehmonxonasida ma’ruza o‘qiyotgan payti mahalliy aholi vakili bo‘lmish ayol unga botinka irg‘itdi. Bu haqda KTLA telekanali ma’lumotiga asoslanib “ITAR-TASS” xabar qilmoqda.
Klinton xonimga biron ziyon yetmadi, o‘zi ham buni hazil bilan qabul qildi, deyiladi xabarda. Voqea joyiga politsiya yetib kelib, botinka otgan ayolni zaldan olib chiqib ketgan. Hozirda u hibsda saqlanmoqda, deya xabar qilgan telekanal.
2012-yilning iyul oyida, Xillari Klinton AQSh davlat kotibi lavozimida ishlayotgan payti Misrga safar qilgan. O‘shanda ham unga pomidor, botinka va suvli idishlar otishgan. Unda ham siyosatchi jabrlanmagan.
Amerikaliklar Xillari Klintonni 2013-yilning eng hurmatga sazovor ayoli deb topganlar. Bu reytingda u ketma-ket 12-marta yetakchilik qilib kelmoqda; umumiy hisobda xonim 18 marta shu e’tirofga loyiq ko‘rilgan. Bu esa AQShda 1948-yildan buyon o‘tkazilib kelayotgan ijtimoiy so‘rovlar tarixida boshqa hech kimga nasib etmagan ko‘rsatkichdir.
Joriy yilning 8-aprelida Xillari Klinton 2016-yilgi prezident sayloviga o‘z nomzodini qo‘yishi mumkinligini ma’lum qilgan. U va AQSh vitse-prezidenti Jozef Bayden prezidentlikka Demokratlar partiyasidan eng munosib nomzodlar sifatida ko‘rilmoqda, ammo ikkalovi ham bu boradagi rejalarini rasman ma’lum qilishmagan.
Izoh (0)