Koreya Respublikasi Harbiy havo kuchlari AQSh bilan hamkorlikda mamlakat hududida eng yirik harbiy o‘quv mashg‘ulotlarini o‘tkazadi. Bu to‘g‘rida mamlakat Koreya respublikasi Mudofaa vazirligi bayonotiga tayanib Kiodo agentligi xabar qiladi.
11–25-aprel kunlari bo‘lib o‘tadigan mashg‘ulotlarda 1,4 ming kishi hamda F-15 rusumli 103 ta qiruvchi samolyot qatnashadi, deb yozadi “RIA Novosti”.
Keyingi paytlarda Koreya yarimorolida vaziyat murakkablashib turibdi. Shimoliy Koreya janubdagi qo‘shnisining AQSh bilan hamkorlikda o‘tkazayotgan mashqlarini o‘ziga tahdid, deb baholamoqda. Yaqinda Nyu-Yorkda bo‘lib o‘tgan matbuot anjumanida mamlakatning BMTdagi doimiy vakili o‘rinbosari Ri Don Il “agar rasmiy Vashington Shimoliy Koreyadagi hozirgi tuzumni ag‘darishga harakat qilishda davom etaversa, KXDR yangi yadro sinovlari o‘tkazishi mumkinligi” haqida bayonot bergan.
Bundan tashqari, Shimoliy Koreya joriy yil boshidan buyon oltmishdan ortiq turli raketalar uchirgan. Unga qarshi tura olish uchun Janubiy Koreya ham yaqinda KXDRdagi har qanday nishonni ura oluvchi raketalarni sinovdan o‘tkazgan. Shuningdek, Pxenyan raketalarni asosan Yapon dengizi tomon uchirayotganligini inobatga olib, Yaponiya mudofaa vaziri ham Shimoliy Koreya raketalarini urib tushirishni buyurgan.
Izoh (0)