Айни пайтда терма жамоамиз билан “Дўстлик” стадионидаги янги базамизда машғулотлар ўтказяпмиз. Паулу Бентунинг Тошкентга келганини кўрдик. Бу мураббий билан қандай келишувга эришилганидан хабарамиз йўқ. Ҳамамиз учун энг асосийси ватан жамоаси. Агар Бенту бошқарадиган бўлса, хайрли бўлсин, дейман. Биз ҳар доим миллий жамоамизни қўллаб-қувватлаймиз. Бу ерда шунчаки ном учун эмас, бош мураббий ким бўлишидан қатъи назар, ватан жамоасини қўллаб-қувватлашимиз керак. Ҳар биримиз жамоамизга мухлислик қилишимиз лозим.

Интернет тармоқларидаги турли гап-сўзларни кўряпман. Мени қўллаб-қувватлаётганларга раҳмат айтаман. Улар учун Аллоҳдан рози бўлишини сўрайман. Раҳбарият тажрибали, жаҳон чемпионатида қатнашган мураббий билан бирга ишлаш ниятида. Балки бу яхшиликка бўлиши мумкин. Жаҳон чемпионатида орттирилган тажриба, албатта, аҳамиятга эга бўлиши мумкин. Биз ҳам имкон қадар ҳар доим ёрдам берамиз. Қолгани эса вақт кўрсатади.

Нима бўлганда ҳам, мени қўллаб-қувватлаган мухлисларга яна бир бор раҳмат айтаман. Раҳбарият қандай қарор қабул қилса, уни қўллаб-қувватлаш керак. Буни жиддий танқид қилишга ҳожат йўқ. Жаҳон чемпионатига кўп вақт қолмади. Биз Мундиалда илк бор иштирок этамиз. Аксинча, футболчиларга яхши энергия ва ижобий кайфият беришимиз зарур.

Худога шукр, қисқа вақт давомида бўлса ҳам Миллий жамоани бошқардим. Халқимизнинг 34 йиллик орзуси ушалди. Бунинг учун ҳаммамиз хурсандмиз. Ўйлайманки, бу барча учун яхшиликка бўлади. Муҳими терма жамоамиз кучли бўлсин, ўз ўрнига эга бўлсин, халқимиз бундан мамнун бўлсин, деди Кападзе.

 Маълумот учун, Ўзбекистон терма жамоасига португалиялик мутахассис Паулу Бенту бош мураббий этиб тайинланиши кутилмоқда.