Тошкентдаги меҳмонхоналарнинг бири олдида жанжал содир бўлгани, оқибатда бир киши оғир жароҳат олиб, комага тушгани ҳақида хабарлар ва ҳолат акс этган видеолар тарқалди.
Унда эркак бир аёл билан жанжаллашаётгани, уни ҳимоя қилишга уринган эркак бир неча муштдан сўнг ҳушидан кетганини кўриш мумкин. Тажовузкор эркак яна бир шахсга ва жанжаллашаётган аёлга ҳам ташланиб, уларни калтаклаган.
Тармоқларда айтилишича, ҳушидан кетган эркакда 5 соатлик жарроҳлик амалиёти ўтказилгач, шифокорлар уни сунъий комага туширди. Унинг ҳаёти хавф остида қолмоқда. Икки нафар боласи бор эркак вафот этиши ёки бир умр ногирон бўлиб қолиши мумкин.
Пойтахт ИИББ матбуот хизматининг маълум қилишича, воқеа 16 март тунги соат 02:30 ларда содир бўлган. Яккасарой туманида жойлашган ресторанлардан бирида мижоз сифатида келган 1995 йилда туғилган А.Ш. ўзининг таниши — 1985 йилда туғилган Х.А. билан ўрталарида келиб чиққан низо сабабли ўзаро жанжаллашган. 1990 йилда туғилган Б.А. уларни ажратишга ҳаракат қилган вақтида А.Ш. уни уриб, тан жароҳати етказган.
Оқибатда Б.А. “бош мия жароҳати, ўнг юзидан лунжи йиртилган жароҳати ва спиртдан захарланиш” ташхиси билан шифохонага олиб борилган.
Мазкур ҳолат юзасидан Яккасарой тумани ИИО ФМБ Тергов бўлими томонидан Жиноят кодексининг 277-моддаси (безорилик) билан жиноят иши қўзғатилган. Тергов ҳаракатлари давом этмоқда. Якуни бўйича қонуний қарор қабул қилиниши таъминланади.
Изоҳ (1)
eng oxir jaza berish kerak