Фаластиннинг ҲАМАС ҳаракати АҚШнинг Ғазо секторида ўт очишни тўхтатиш режасини рад этди. Исроил Ғазо секторига гуманитар ёрдамни Трамп маъмурияти билан маслаҳатлашган ҳолда тўхтатгани маълум бўлди. Бу ҳақида ABC News хабар берди.
Биз АҚШ маъмуриятини жиноятчи Нетаньяхунинг фашистик режаларини қўллаб-қувватлашни тўхтатишга чақирамиз, дейилади ҲАМАС матбуот хизмати баёнотида.
ҲАМАС 19 январдан кучга кирган сулҳ шартларига содиқлигини яна бир бор тасдиқлади. Исроил ва ҲАМАС ўртасида ўт очишни тўхтатиш бўйича келишувнинг биринчи босқичи 1 март оқшомида якунланди. Исроил бош вазири Биньямин Нетаньяху 2-босқич музокаралар бошланганини айтди. У Ғазо секторига олиб борилаётган барча инсонпарварлик ёрдамларини тўхтатиб қўйди.
Яҳудий манбаларига кўра, “Исроилнинг Ғазога ёрдамни тўхтатиш қарори Трамп маъмурияти билан келишилган”. Исроил Ғазога ўт очишининг асосий сабаб сифатида гаровга олинганлар масаласини қўймоқда.
Исроил гаровга олинганларни озод қилмасдан туриб, ўт очишни тўхтатишга йўл қўймайди. Агар ҲАМАС рад этишда давом этса, бундан кейинги оқибатлар ёмонроқ бўлиши мумкин, дейилади Исроил ҳукумати баёнотида.
2 март куни томонлар келишмовчиликни бартараф этишнинг иложи йўқлиги таъкидлаб, урушни 20 апрелгача, мусулмонларнинг муқаддас Рамазон ойи ва Пасха байрами муносабати билан тўхтатишга қарор қилди.
Шу куни биринчи босқич музокаралар якунлагани сабаб гаровга олинганларнинг ярми озод қилинди ва ҳалок бўлганларнинг баъзи жасадлари қайтарилиши айтилди. Исроил баёнотига кўра, доимий ўт очишни тўхтатиш келишувидан сўнг, қолган тирик гаровдагилар озод қилинади ва қурбонларнинг жасади эса топширилади.
Исроил—Фаластин битими
2025 йилнинг 19 январь куни Исроил ва ҲАМАС ўртасида ўт очишни тўхтатиш тўғрисидаги келишув имзоланди. Битим натижасида ҲАМАС Исроил томонига 33 нафар гаровга олинганларни топширган. Исроил эса армиясини Ғазо сектори ҳудудларининг аксарият қисмидан олиб чиққан. Фақатгина Ғазо сектори ва Миср ўртасидаги Филаделфия йўлагида, шунингдек, Фаластин эксклави ва Исроил чегарасидаги махсус буфер ҳудудида ҳарбий мавжудлигини сақлаб қолган.
Битим икки томоннинг келишуви асосида 3 босқичда амалга оширилиши режалаштирилган. Бундан ташқари келишувнинг иккинчи босқичи гаровга олинганларнинг барчасини топширишга, учинчи босқичи эса Ғазонинг урушдан кейинги тикланишига қаратилган.
Изоҳ (0)