Қатар пойтахти Доҳа шаҳрида қийин аҳволда қолган Ўзбекистон фуқароси оиласи бағрига қайтди. Бу ҳақда “Дунё” АА мухбири хабар берди.
2024 йил май ойида Қатарга ишлаш мақсадида борган Х.Н. иш берувчининг ёлғонлардан иборат аризаси асосида Қатар қонунчилигининг бир неча моддаларини бузганликда айбдор деб топилгани ва ҳибсга олингани боис амалий ёрдам сўраб элчихонага мурожаат қилган.
Маълум бўлишича, у 2024 йилда Доҳа шаҳрига гўзаллик салонида ишлаш мақсадида келган. Август ойида фуқаро иш берувчининг турли сабабларни рўкач қилиб, гўзаллик салони ҳудудини тарк этиш талабидан кейин вақтинча яшаш учун меҳмонхонага жойлашади. Орадан ҳеч қанча вақт ўтмай маҳаллий полиция ходимлари фуқарони қочоқ ва ўғриликда гумон қилиб қўлга олади.
Қийин вазиятда қолган фуқаронинг ҳақ-ҳуқуқларини ҳимоя қилиш мақсадида Ўзбекистон дипломатлари томонидан унга консуллик-ҳуқуқий ёрдам кўрсатилди, вақтинча турар жой ва озиқ-овқат билан таъминланди.
Суриштирувлар давомида Ўзбекистон фуқаросига иш берувчи томонидан туҳмат қилингани, кафил рухсатисиз қочгани ва ўғирликни содир этгани сабабли 1 йиллик жазо муддатини ўтамагунча Қатар ҳудудини тарк эта олмаслиги маълум бўлди.
Қатар ҳуқуқни муҳофаза қилувчи ва тегишли органлари билан олиб борилган музокаралар ва суд эшитувлари жараёнларида дипломатлар иштироки таъминланди. 8 ой давомида олиб борилган саъй-ҳаракатлар натижасида 1 йил муддатга жазони ижро этишга ҳукм қилинган Х.Н. суд залидан айбсиз деб топилиб озод қилинди. Шунингдек, унга Қатар ҳудудини тарк этиш бўйича қўйилган барча тақиқлар олиб ташланди.
5 март куни у Доҳа—Тошкент йўналишидаги тўғридан-тўғри ҳаво қатнови орқали Ўзбекистонга қайтарилди.
Хориждан Ўзбекистонга қайтарилаётган шахслар
2024 йил август-сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди.
Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
2025 йилнинг февраль ойи охирида Россияда икки боласи билан қийин вазиятда қолган аёл Ўзбекистонга қайтарилганди.
Аввалроқ Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилгани ҳақида хабар берилганди.
Изоҳ (0)