Enter Engineering компанияси маош олмагани учун иш ташлаш қилган минглаб ходимларининг оммавий чиқишидан сўнг, бугун, 9 апрель куни январь ойи маошини тарқатишни бошлади. Бу ҳақда “Дарё”га компания ишчилари маълум қилди.
Билдирилишича, айни пайтда компаниянинг Тошкент вилояти Олмалиқ шаҳри ва Сурхондарё вилоятининг Бойсун туманидаги заводи ишчиларига маош берилмоқда.
Навбат жудаям кўп. Кўпчилик эртага байрам бўлгани учун пул оламиз деб, узоқ масофалардан ҳам келган. Фақатгина январь ойи маошимизнинг 70 фоизини нақд шаклида беришяпти. Қолган 30 фоизини пластик карточкамизга ташлашар экан, — дейди маош олаётганидан қувонган ишчи.
Кеча, Enter Engineering ишчилари маош берилмагани сабаб иш ташлагани, 2023 йил охиридан буён маош ололмаётган ишчилар шу тарзда норозилигини намойиш қилаётгани хабар берилганди. Кўп ўтмай бунга муносабат билдирган компания масъуллари ишчиларига 2024 йилнинг февраль ойи учун ҳам маош тўланганини, эндиликда март ойи учун иш ҳақини тўлаб бериш жараёнлари давом этаётганини маълум қилди.
Компаниянинг бу маълумоти билан танишган ишчилар масъуллар ёлғон гапириб, вазиятдан чиқишга уринаётганини айтди.
Бу ёлғон, шунчаки вазиятдан чиқиш учун айтилаётган маълумот. Бизда 2023 йилнинг ноябрь ойи учун ҳам маош олмаганлар бор. 2024 йилнинг январь, февраль ойи ҳақида гапирмасак ҳам бўлади, — деганди бу ҳақда таҳририятга гапирган суҳбатдош.
Яна бир ишчи тўполонлар сабаб масъуллар кўпчиликка таҳдид қилиб, ишдан бўшатиш билан қўрқитганини билдирди.
Изоҳ (0)