Telegram каналларда Париж Олимпиадаси ғолиби Асадхўжа Мўйдинхўжаев президент томонидан совға қилинган Tahoe автомобилини шаҳар ҳудудида соатига 110 км тезликда бошқаргани акс этган видео тарқалди. Ҳолат кўпчилик муҳокамасига сабаб бўлди.
Тошкент шаҳар ИИББ ЙҲХБ ахборот хизмати раҳбари Қаҳрамон Худойбергановнинг “Дарё”га билдиришича, чемпион эгалигидаги автомобиль шаҳар бўйлаб қидирувга берилган.
Қонун ҳамма учун бир, ҳар бир ҳуқуқбузарлик учун ҳам жавобгарлик муқаррар. Тез орада автомобиль топилиб, чора кўрилади ва бу ҳақда жамоатчиликка расмий каналларимиз орқали маълумот берамиз, деди масъул.
Кўп ўтмай, автомобиль топилгани, қоидабузар чемпион автомобили шаҳар ЙҲХБ биносига олиб келинаётгани қўшимча қилинди. Бироқ бугун соат 15:20 га қадар Тошкент шаҳар ИИББ ЙҲХБ автомобиль ҳайдовчисига нисбатан бирор-бир чора кўрилганини очиқламади.
“Дарё” воқеалар ривожини кузатишда давом этади.
Изоҳ (1)
Juda tugʻri qaror buni ijrosini yanada tezlatish kerak