Жиноят ишлари бўйича Мирзо Улуғбек тумани судида танишининг жинсий аъзосини аввалига ўтмас пичоқ, сўнгра темир кесувчи арра билан кесиб ташлаб, 21 маротаба пичоқ санчганлар иши кўриб чиқилди. Бу ҳақда судда қатнашган “Дарё” журналисти хабар берди.
Ушбу қотилликни содир этишда айбли деб топилган 2 нафар судланувчининг ҳар бири 18 йил муддатга озодликдан маҳрум қилинди.
Судда маълум бўлишича, 37 ва 32 ёшли фуқаролар ўзлари яшаб келаётган Мирзо Улуғбек туманидаги кўп қаватли уйлардан бирининг ертўласида 37 ёшли шахснинг туғилган куни баҳонасида танишларини йиғган. Базмдаги спиртли ичимлик уларнинг кўз кўриб, қулоқ эшитмаган қотилликни содир этишига сабаб бўлди.
2024 йилнинг 9 март куни базмга келган меҳмонлардан бири туғилган кун эгасининг онасини ҳақорат қилиб, сўкинган. Базм эгаси танишидан онасини ҳақорат қилгани учун ўч олиш мақсадида хонада турган стул билан унинг елка ва бош қисмига урган. Йиқилиб тушган танишига жисмоний азоб бериш учун унинг устига чиқиб, шимини тиззасигача тортиб ечган. Ёнидаги танишига унинг оёғидан ушлаб туришни буюриб, стол устидаги ошхона пичоғи билан танишининг жинсий аъзосини кеса бошлаган.
Бироқ пичоқ ўтмас бўлгани учун у шеригидан металл кесишга мўлжалланган аррани олиб келишини сўраган. Аррани олиб келган шеригидан аррани олиб, ишини давом эттирган ва таниши Ў.У.нинг жинсий аъзосини кесган. Бу ҳам етмаганидек, унга 21 маротаба пичоқ санчган.
Олган тан жароҳатлари оқибатида меҳмон бўлиб келган Ў.У. ҳодиса жойида вафот этган.
Изоҳ (0)