Тошкентда фоизга пул бериб, қарздорларнинг уй-жойларини тортиб олиш билан шуғулланганликда гумонланиб уч киши қамоққа олинди. Бу ҳақда пойтахт ИИББ матбуот хизмати хабар берди.
Тергов бошқармаси томонидан Жиноят кодексининг 168-моддаси (фирибгарлик) билан тергов қилинаётган жиноят иши доирасида аниқланишича, 1989 йилда туғилган Роминов Сардор Фарходович, 1990 йилда туғилган Юлдашев Бахтиёр Хабибулла ўғли, 1993 йилда туғилган Хусаинов Тимур Рустамович бир қатор жиноятлар содир этганликда гумон қилинмоқда.
Жумладан, ушбу шахслар фуқароларга фоиз эвазига пул бериб, қарз олган шахснинг номида бўлган турар жой ва бошқа кўчмас мулкларини гаров эвазига ўзининг номига расмийлаштириб олган.
Фуқаролар белгиланган муддатда қарз ва фоизларини бермаган тақдирда, уй-жойдан оиласи билан чиқариб юбориш ва мулкини тортиб олиш билан шуғулланиб келган. Ваҳоланки, гаровга қўйилган мулк миқдори фоиз эвазига берилган пул маблағидан 3-4 баробар кўп бўлган.
Шунингдек, фуқаро билан қарз ёки олди-сотди шартномаси тузилганидан сўнг келишилган суммадан кам миқдорда пул берган. Хусусан, фуқаро улардан 100 минг АҚШ долларини фоиз эвазига сўраса, олди-сотди ёки қарз шартномаси расмийлаштириб бўлганидан сўнг 65-70 минг АҚШ доллари атрофида пулларни бериб, қолган пулларни маклерлик хизмати, бошқа харажатлар учун олиб қолганини айтади, кейинчалик фоиз тўловларни камайтириб бериши ҳамда тўловлар кечикса, безовта қилмаслиги ҳақида айтиб, алдаган.
Тергов жараёнида 1989 йилда туғилган Роминов Сардор Фарходович, 1990 йилда туғилган Юлдашев Бахтиёр Хабибулла ўғли ва 1993 йилда туғилган Хусаинов Тимур Рустамович жиноят содир этганликда гумонланиб ушланган. Уларга нисбатан қамоққа олиш тарзидаги эҳтиёт чораси қўлланган.
“Ҳурматли фуқаролар, агар сиз ушбу шахслардан жабр кўрган бўлсангиз ёки ушбу шахсларнинг жиноий хатти-ҳаракатлари бўйича бирор маълумотга эга бўлсангиз, Тошкент шаҳар ИИББнинг 71-206-40-97 ёки 102 рақамларига ёхуд 90-976-28-21 Telegram рақамига мурожаат қилишингизни сўраймиз. Мурожаатчининг шахси сир сақланиши кафолатланади”, дейилади хабарда.
Февраль ойи бошларида фоиз эвазига пул бериб, қарздорларнинг уй-жойларини тортиб олиш билан шуғулланганликда гумонланиб 31 ёшли Тохиржон Абдумаликов қўлга олинганди. У ҳам фуқароларга фоиз эвазига пул бериб, қарз олган шахснинг номида бўлган турар жой ва транспорт воситаларини гаров эвазига ўзининг номига расмийлаштириб олган. Фуқаролар белгиланган муддатда қарз ва фоизларини бермаган тақдирда уй-жойдан оиласи билан чиқариб юбориш ва транспорт воситасини тортиб олиш билан шуғулланиб келган. Гаровга қўйилган мулк миқдори фоиз эвазига берилган пул маблағидан 3-4 баробар кўп бўлган.
Изоҳ (0)