Тошкент вилояти Юқори Чирчиқ туманида Cobalt 11 ёшли мактаб ўқувчисини уриб юборди. Бу ҳақда вилоят ЙҲХБ хабар берди.
Маълум қилинишича, ҳолат жорий йилнинг 30 сентябрь куни соат 07:45 ларда Юқори Чирчиқ тумани ҳудудидан ўтган Д 014 Ғазалкент—Чирчиқ—Янгибозор— Жумабозор— Ўртасарой—Нурафшон автомобиль йўлининг 41-километрида жойлашган 14-сонли мактаб қаршисида содир бўлган.
Ҳайдовчи М.Н Cobalt’да ҳаракатланиб кетаётиб, йўлнинг ўнг томонидан чап томонига пиёдалар ўтиш жойидан кесиб ўтаётган 2013 йилда туғилган 14-мактаб ўқувчиси М.А.ни уриб юбориб йўл-транспорт ҳодисаси содир этган. Натижада пиёдага марказий шифохонада биринчи ёрдам кўрсатилган.
Ҳозирда аҳволи яхшилиги сабабли шифохонадан рухсат берилган. Ҳолат юзасидан Юқори Чирчиқ тумани ИИБ Йўл ҳаракати хавфсизлиги бўлими томонидан суриштирув ишлари олиб борилмоқда.
Бундан аввал Тошкентда BYD уриб юборган 9 ёшли мактаб ўқувчиси вафот этганди. Худди шу каби ҳолат 1 июль куни Навоий вилояти Хатирчи туманида содир бўлган. 140 км/соат тезликда ҳаракатланаётган BYD русумидаги автомобиль тартибга солинмаган пиёдалар ўтиш жойидан ўтаётган 9 ёшли қизалоқни босиб кетиб, унинг бевақт ўлимига сабаб бўлганди.
Бундан ташқари, 3 июль куни Самарқанд туманида Nexia-2 русумли автомобиль йўлнинг белгиланмаган қисмидан югуриб ўтаётган 7 ёшли болани уриб юборган. Ушбу ҳодиса оқибатида эса 2017 йилда туғилган бола кўрсатилган тиббий муолажаларга қарамасдан шифохонада бевақт ҳаётдан кўз юмган.
Изоҳ (0)