Тошкент вилояти Қуйи Чирчиқ тумани ҳудудидан оқиб ўтувчи Чирчиқ дарёси муҳофаза минтақасидан мораторийга қарамай техника воситалари ёрдамида қум-шағал қазиб олинаётгани аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Маълум қилинишича, бунинг оқибатида табиатга 183 миллиард сўмдан ортиқ зарар етказилди. Махсус техника воситалари Маъмурий жавобгарлик тўғрисидаги кодекснинг 291-моддаси тегишли бандига асосан вақтинча сақлаш учун жарима майдонига жойлаштирилди.
Ҳолатга ҳуқуқий баҳо бериш ва тегишли чора кўриш учун ҳужжатлар Тошкент табиатни муҳофаза қилиш прокуратурасига юборилди.
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, Чирчиқ дарёси бўйида ноқонуний қум-шағал қазиб олиш давом этмоқда. Апрель ойида Чирчиқ дарёсида қум-шағал қазиб олиниши натижасида табиатга 80 миллиард сўмдан ортиқ зарар етказилганди. Май ойида Президент администрацияси, Бош прокуратура, Экология вазирлиги ва “Ҳавфсиз дарё” ДУК ходимларидан иборат ишчи гуруҳи томонидан мониторинг чоғида Чирчиқ дарёсининг соҳилбўйи ва сувни муҳофаза қилиш зоналарида 10 дан ортиқ тадбиркорлар мораторий талабларини бузган ҳолда, илгари Геология вазирлиги томонидан берилган лицензиялар асосида қум-шағал материалларини қазиб олишни давом эттираётгани аниқланганди.
Изоҳ (0)