Марказий банк тижорат банкларидаги омонатлардан пул ечишда истеъмолчидан маблағнинг манбаси сўралаётгани ҳақида тарқалган хабарларга изоҳ берди.
Маълум қилинишича, жисмоний шахслар ўзларига тегишли омонат ҳисобварақларидан пул маблағларини ечиб олаётганда ушбу маблағнинг келиб чиқиш манбаси тўғрисида маълумот талаб қилинмайди.
Таъкидланишича, Марказий банк молиявий хизматлар кўрсатилишига доир юзага келаётган муаммо ва камчиликларни аҳоли ва тадбиркорлик субъектларининг мурожаатлари ҳамда бошқа манбалар орқали доимий равишда ўрганиб, уларни бартараф этиш чораларини кўриб боради.
МБ фуқаролардан банклардаги омонатдан пул ечишда унинг келиб чиқиш манбаси тўғрисида маълумот талаб қилинса, 71 212-60-94 ва 71 212-73-62 рақамлари орқали боғланишни тавсия қилди.
Шу билан бирга, банклар, микромолия ва тўлов ташкилотлари фаолиятида хизматлар кўрсатилишига оид истеъмолчиларнинг ҳуқуқлари бузилаётгани юзасидан мурожаатлар ёки таклифлар бўлса, уларни Марказий банкнинг info@cbu.uz электрон манзилига юбориш сўралади, дея қўшимча қилинади хабарда.
Аввалроқ кафолатланган омонатларни 200 млн сўмгача чеклашга қаратилган қонун маъқулланганди. Банк тугатилганда компенсация тўлови 2025 йил 1 январдан бошлаб 20 иш куни, 2026 йил 1 январдан 15 иш куни, 2027 йил 1 январдан 7 иш куни мобайнида амалга оширилади.
Изоҳ (0)