Навоий вилоятининг Ғозғон ҳамда Самарқанд вилоятининг Каттақўрғон шаҳрида ҳайдовчилик гувоҳномасини олиб бериш билан боғлиқ фирибгарлик ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Ғозғон шаҳрида фуқаро Т.Ш. фуқаро Ф.Ғ.нинг ишончига кириб, унга гўёки юқори лавозимда ишловчи танишлари ёрдамида “Б” тоифадаги ҳайдовчилик гувоҳномасини олиб беришни ваъда қилган. Бунинг эвазига 1 200 долларни олган вақтида ушланган.
Шунингдек, Каттақўрғон шаҳрида фуқаро М.Ж. фуқаро Б.Ш.нинг ишончига кириб, унга ҳайдовчилик гувоҳномасини олиб бериши эвазига 600 долларни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
“Права” олиб бермоқчи бўлган “уддабурон”лар
Сентябрь ойида Сирдарё вилоятининг Ширин, Навоий ва Тошкент вилоятининг Янгийўл шаҳарларида ўқув курсларига қатнашмасдан ҳайдовчилик гувоҳномасини олиб беришни ваъда қилган шахслар ушланганди.
Октябрда Тошкент вилоятининг Пискент ҳамда Оҳангарон туманларида ҳайдовчилик гувоҳномаларини олиб беришни ваъда қилган шахслар ушланган.
Ноябрь ойида Самарқанд ва Андижон вилоятларида сохта ҳайдовчилик гувоҳномаси расмийлаштириб бериш ва сертификат олиб бериш билан боғлиқ фирибгарлик ҳолати фош этилганди.
Изоҳ (0)