Андижон вилоятининг Булоқбоши туманида 8 май куни Фарғона канали қирғоғи ўпирилиб, сув тошиб чиққанди. Сув хўжалиги вазирлиги ҳолат юзасидан баёнот берди.
Унда келтирилишича, 8 май куни соат 8:00 ларда Андижон вилоятидан оқиб ўтувчи Жанубий Фарғона магистрал каналининг ПК-194+60 пикетида кичик ГЭС қуриш ишларини олиб бориш жараёнида каналнинг дамбасини сув ювиб кетган.
Вазирлик топшириғига кўра, вазиятни ўрганиш ва заруратга кўра тегишли тадбирларни амалга ошириш учун “Норин—Қорадарё” ирригация тизимлари ҳавза бошқармаси бошлиғи, “Сувхўжаликназорат” инспекцияси раҳбари, инспекциянинг Андижон вилоят бошқармаси бошлиғи, Фарғона магистрал каналлардан фойдаланиш бошқармаси бошлиғи ҳамда тегишли идораларнинг вакилларидан иборат таркибда ишчи гуруҳи тузилган ва улар зудлик билан воқеа жойига етиб борган.
Электр энергияси ишлаб чиқаришни йўлга қўйиш учун каналнинг ПК-194+60 пикетида “Гидропроэкт” МЧЖ лойиҳаси асосида “Гидроқурилиш буюртмачи хизмати” МЧЖ буюртмаси билан ГЭС қуриш ишлари олиб борилмоқда. Ишчи гуруҳининг аниқлашича, ушбу пикетда каналнинг лойиҳавий сув ўтказиш қобилияти 80 м3/секунд бўлиб, ҳолат юзага келган вақтда каналдан 60 м3/секунд сув ўтиб турган.
Фавқулодда вазиятни бартараф этиш учун Андижон сув омборидан сув чиқиши тўхтатилди. Ҳозирда каналда 30 м3/сек сув қолган бўлиб, соат 14:00 гача тўлиқ тўхтатилди. Каналдаги ўтган сув Қуйи Жанубий Фарғона каналига йўналтирилди. Ҳозирда аҳоли хонадонларига сув оқишини камайтириш чоралари кўрилмоқда.
Канал дамбасини тиклаш бўйича штаб ташкил этилиб, раҳбар ходимлардан иборат доимий навбатчилик йўлга қўйилди. Фавқулодда вазиятни бартараф этиш учун 10 та самосвал, 4 та кара, 2 та бульдозер, 8 та экскаватор ва 50 дан ортиқ ишчи-ходимлар жалб қилинди.
Ҳодиса оқибатида ён-атрофдаги маҳаллаларни сув босганди. “Ўзгидромет” бирламчи ахборотида 560 та хонадонни сув босгани хабар қилинганди. Кейинроқ ФВВ 100 тага яқин хонадонларга сув киргани, шундан 30 хонадон ичига, 70 та хонадон томорқасига сув кирганини маълум қилди.
“Ўзбекгидроэнерго” ҳудуд аҳолисини ортиқча ваҳимага берилмасликка ва хотиржамликка чақирди. Андижон вилояти ҳокимлиги матбуот хизмати вилоят ҳокими бошчилигидаги мутасадди ташкилотлар иштирокида ишчи гуруҳ тузилиб, ҳолат бартараф этилаётганини билдирди.
Изоҳ (0)