Ижтимоий тармоқларда Тошкентдан водийга кетишда Ангрен шаҳридаги кўприк қулаб тушиши оқибатида йўл ёпилгани ҳақида хабарлар тарқалди. Ҳолат юзасидан Автомобиль йўллари қўмитаси изоҳ берди.
Маълум қилинишича, Қорабоғсой кўприги 1969 йилда “МСУ-14 трест УЗ мостстрой” томонидан қуриб фойдаланишга топширилган. 1995 йилда реконструкция қилинган. Кўприк уч оралиқли схемаси 3х22.2 м улукли схемада II тоифали автомобиль йўлига мўлжалланиб қурилган.
“Ўзйўлкўприк” кластерининг Кўприк ва сунъий иншоотларни диагностика қилиш бўлими мутахассислари томонидан Автомобиль йўллари қўмитасининг мурожаатига асосан қисқа муддатда мазкур кўприкда ўрганиш ишларини амалга ошириб, тегишли хулосани тақдим этган.
Унга кўра, кўприк конструкцияси техник ҳолати ўрганилганда оралиқ қурилма тўсинларининг эскиргани, тўсинларнинг амалдаги юкламаларни кўтара олмаслиги, кўприк устки қопламаси қалинлиги меъёридан ортиб тўсинларга ортиқча юк бераётганлиги, тўсинлар ўзаро яхлит бўлмай, алоҳида элемент сифатида ишлаётганлиги ҳамда кўприк устки қопламасидаги ёриқлардан ва қатнов қисми қопламасининг чекка қисмларидан оқиб тушган сувлар тўсинларни бутун танаси бўйлаб тарқалиб, каррозияга учратаётганлиги, тўсинлардаги ёриқлардан сув сизиб кириб, ишчи арматураларини ҳам каррозияга учратаётганлиги аниқланган.
“Кўприкнинг умумий техник ҳолати қониқарсиз ҳолатда дея баҳоланади ва келгусида содир бўлиши мумкин бўлган авария ҳолатларининг олдини олиш мақсадида кўприкда тўлиқ реконструкция ишларини олиб бориш лозимлиги, кўприк жойлашган автомобиль йўли I тоифага тўгри келганлиги, кўприк габарити автомобиль йўлига мос эмаслиги, автомобиллар ҳаракатида айнан кўприк жойлашган оралиқда тирбандликлар ҳосил бўлаётганлигини инобатга олиб, кўприк реконструкция ишлари доирасида автомобиль йўли тоифасига ва замонавий А 14, НК 100 меъёрий талабларга мос бўлган янги кўприкни қуриш мақсадга мувофиқлиги айтиб ўтилган”, дейилади хабарда.
13 май куни тахминан соат 20:00 да Қорабоғсой кўприги четидаги охирги оралиқ қурилмаси, яъни пиёдалар йўлаги (бир дона оралиқ қурилма балка 22.1 м) синиши оқибатида ушбу йўналиш бўйича автомобиллар ҳаракати вақтинча чекланиб, ҳаракатланиш вақтинча “Ангрен шаҳрини айланиб ўтиш” автомобиль йўлига ўтказилган.
Изоҳ (0)