ДХХ Ўзбекистонга Афғонистон, Тожикистон ва Қирғизистондан келтирилган 47 килодан ортиқ наркотик моддалар мусодара қилинганини маълум қилди.
Сурхондарё вилоятининг Узун туманида яшовчи, 1971, 1974, 1985 йилларда туғилган уч нафар фуқаро Тожикистондан 10 килограмм 50 грамм опий ва 10 килограмм 29 грамм гашиш моддаларини контрабанда йўли билан олиб ўтган вақтларида ДХХ Чегара қўшинлари ҳарбий хизматчилари томонидан қўлга олинган.
ДХХ Сурхондарё вилояти бўйича бошқармаси ҳамда вилоят ИИБ ходимлари ҳамкорлигида ўтказилган тезкор тадбирда наркокурерлар томонидан Афғонистондан олиб келиниб, Музработ тумани ҳудудидаги хуфия жойга қолдириб кетилган 1 килограмм 953 грамм опий ва 4 килограмм 116 грамм гашиш моддаларини қабул қилиб олган вақтида Термиз шаҳрида яшовчи, 1981 йилда туғилган, муқаддам гиёҳвандлик воситалари савдоси билан боғлиқ жинояти учун судланган шахс ушланган.
Шунингдек, тезкор тадбир давом эттирилиб, ушбу наркотик моддаларни Термиз шаҳрида қабул қилиб олган вақтида 1976 йилда туғилган Қозоғистон фуқароси ҳам қўлга тушган.
Термиз туманида ўтказилган тезкор тадбирда муқаддам наркокурерлар томонидан хуфия жойга қолдириб кетилган 922 грамм опий ва 4 килограмм 203 грамм гашиш моддаларини олиб, доимий яшаш манзилига кетмоқчи бўлган вақтида Самарқанд шаҳрида истиқомат қилувчи, 1977 йилда туғилган фуқаро ушланган.
Мазкур шахс наркотик моддаларнинг ҳар бир килограммини афғонистонлик наркосавдогарлардан 2300 доллардан сотиб олган.
Сариосиё туманида қайд этилган ҳолатда Денов туманида яшовчи, 1968 йилда туғилган, муқаддам гиёҳвандлик воситалари савдоси билан боғлиқ жинояти учун судланган фуқаро тўхтатилиб текширилганда, унинг ёнида 4 килограмм 80 грамм гашиш моддаси борлиги аниқланиб, процессуал тартибда расмийлаштириб олинган. Маълум бўлишича, ушбу гиёҳвандлик воситаси Тожикистондан айланма йўллар орқали олиб келинган.
Бу йўналишда ДХХ Фарғона вилояти бўйича бошқармаси ходимлари ҳам тезкор тадбирлар ўтказишди. Хусусан, Қўқон шаҳрида яшовчи, 1979 йилда туғилган шахс бошқарувидаги Gentra тўхтатилиб текширилганда унинг салонида 975 грамм опий борлиги аниқланиб, тегишли тартибда ҳужжатлаштириб олинган.
Шунингдек, тезкор тадбир давом эттирилиб, унинг яшаш хонадонидан ҳам 789 грамм опий ҳамда 5 килограмм 239 грамм гашиш моддалари олинган.
Аниқланишича, мазкур фуқаро тожикистонлик наркосавдогарлар томонидан юборилган ушбу заҳри қотилни Қўқон шаҳрида сотишни режалаштирган.
Бошқа ҳолатда эса муқаддам қирғизистонлик наркокурерлар томонидан Қувасой шаҳри ҳудудидаги хуфия жойга қолдириб кетилган 4 килограмм 922 грамм гашиш моддасини олиб, доимий яшаш манзилига кетаётган вақтида Фарғона шаҳрида истиқомат қилувчи, 1998 йилда туғилган фуқаро ушланган.
Ҳозирда мазкур шахсларга нисбатан жиноят ишлари қўзғатилиб, қамоқ эҳтиёт чораси қўлланилган.
Изоҳ (0)