Сурхондарё вилояти ҳокимлиги Бойсундаги кон портлатилиши ҳақидаги хабарларни рад этди.
Ижтмоий тармоқларда “М-25” конида газ чиқишини тўхтатиш мақсадида енгил портлатиш ишлари амалга оширилиши ҳақида хабарлар тарқалганди. Вилоят ҳокимлиги бу ёлғон эканини билдирди.
“Мазкур хабар асоссиз бўлиб, ҳозирда бундай чораларни амалга ошириш режалаштирилмагани маълум қиланади ҳамда бу каби ёлғон хабарларга ишонмасликни ва тарқатмасликни сўраймиз”, дейилади ҳокимлик баёнотида.
Сурхондарё вилояти ҳокимлиги аҳоли ўртасида ваҳима уйғотувчи ёлғон ва асоссиз хабарларни тарқатганлик учун қонунчиликда жавобгарлик белгиланганини ҳам эслатиб ўтди.
Бойсун конидаги авария
1 сентябрь куни соат 15:17 да Сурхондарё вилояти Бойсун тумани “Кўлқамиш” МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилди. Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинди. Техноген офат асоратларини бартараф этиш бўйича барча тегишли вазирлик ва ташкилотларни жалб этган ҳолда, тезкор штаб ташкил этилди.
15 сентябрь куни соат 16:50 да сизиб чиқиш тўхтатилди. 17 сентябрь куни эса мазкур конда яна газ чиқиш ҳолати юз берди. Янги авария оқибатида тўрт киши ҳалок бўлди. Улар конда ишлаган пудратчи ташкилот ходимлари бўлган.
Изоҳ (0)