Тошкент шаҳрининг марказий кўчаларида 4-апрель кунидан 9-апрель кунига қадар юк транспорт воситаларининг ҳаракати тўлиқ чекланади. Бу ҳақда ЙҲХБ хабар берди.
Келтирилишича, 2025 йил 4-апрель кунидан 9-апрель кунига қадар пойтахт Тошкент шаҳрида Парламентлараро иттифоқининг 150-юбилей ассамблеяси тадбирлари ўтказилиши режалаштирилган.
Шу вақт ичида пойтахтнинг марказий кўчаларида юк транспорт воситаларининг ҳаракати тўлиқ чекланиши сабабли, қурилиш объектларида оғир ва енгил вазнли барча тоифадаги юк ташувчи транспорт ҳайдовчилари фақат Тошкент ҳалқа автомобиль йўлидан ҳаракатланишлари мумкин.
Вақтинчалик ноқулайликлар учун узр сўраймиз ва ҳайдовчиларга ўз йўлларини олдиндан режалаштиришларини тавсия қиламиз, дейилади хабарда.
Тошкент шаҳрининг Мирзо Улуғбек туманидаги Ўзбекистон овози кўчаси 7/24 кўчага айланмоқда. Шу муносабат билан 27 март куни соат 7:00 дан 30 апрелгача Ўзбекистон овози кўчасининг Шастри кўчаси билан кесишмасидан Яҳё Ғуломов кўчасига қадар қисми вақтинча автомашиналар ҳаракати учун ёпилиши айтилганди.
Шунингдек, қурилиш-таъмирлаш ишлари олиб борилиши муносабати билан Олмазор туманидаги Қорасарой кўчасида транспорт воситалари ҳаракати вақтинча тўхтатилади. Ёпиладиган қисм: Абдулла Қодирий кўчаси билан кесишган жойдан Нурафшон кўчаси билан кесишган жойгача.
Ишларни бажариш муддати: 2025 йил 2 апрелдан сентябрь ойигача.
Изоҳ (0)