Apple’нинг янги смартфонлари АҚШ президенти Дональд Трамп маъмуриятининг божхона тўловлари сабабли 30 фоизга қимматлашиши мумкин. Бу ҳақда Reuters хабар бермоқда.
Агентлик сўровнома ўтказган таҳлилчиларнинг фикрича, Apple ўз маҳсулотлари, жумладан iPhone нархини 30-40 фоизга ошириш орқали божхона тўловларининг салбий таъсирини юмшатиши мумкин. Counterpoint Research компанияси раҳбари Нил Шоҳ айтишича, импорт божхона тўловларини қоплаш учун Apple нархларни учдан бирга оширишга мажбур бўлади.
Таъкидланишича, Apple ишлаб чиқаришнинг бир қисмини Хитойдан Ҳиндистон ва Вьетнамга кўчирган, бироқ бу мамлакатлар ҳам тегишли равишда 26 ва 46 фоизлик божхона тўловлари жорий этган. “Бизнинг башоратимизча, Apple смартфонлар нархининг сезиларли даражада оширилишини iPhone 17 чиқиши кутилаётган кузга қолдиради”, дейди таҳлилчи Анжело Зино.
Rosenblatt Securities таҳлилчилари башоратига кўра, Apple’нинг энг арзон смартфони — iPhone 16e нархи 599 доллардан 856 долларгача кўтарилиши мумкин. Ўз навбатида, iPhone 16 нархи 799 доллардан 1142 долларгача, 1 терабайтли хотирага эга флагман iPhone 16 Pro Max эса 1599 доллардан 2300 долларгача қимматлашади.
Нуфузли ички маълумотлар манбаси Мин-Чи Ко Apple АҚШдаги импорт божхона тўловларига қарши курашиш мақсадида маҳсулот нархини ошириши ёки Ҳиндистонда ишлаб чиқаришни кенгайтириши мумкин.
Изоҳ (0)