Қирғизистонлик чегарачилар Чу дарёси орқали қирғиз-қозоқ чегарасини ноқонуний кесиб ўтган Ўзбекистон фуқаросини қўлга олди. Бу ҳақда Қирғизистон Миллий хавфсизлик давлат қўмитаси Чегара хизматига таяниб, 24.кг хабар берди.
Чегарачилар Қозоғистон ҳудудида Қирғизистон чегара чизиғига бевосита яқин жойлашган Mercedes-Benz русумли автомобилни аниқлаган. Шундан сўнг улар автомобилнинг қаршисидаги чегара ҳудудига йўналган. Чегарачилар Чу дарёси орқали Қирғизистонга пиёда ўтган аёлни қўлга олган. Унинг ёнида шахсини тасдиқловчи ҳужжатлари бўлмаган.
Аёлнинг сўзларига кўра, у 40 ёшли Ўзбекистон фуқароси ҳисобланади. Тегишли ҳужжатлар расмийлаштирилгандан сўнг, қўлга олинган шахс қўшимча текширув ўтказиш ва воқеанинг барча тафсилотларини аниқлаш учун ваколатли органлар ходимларига топширилган. Чегара хизмати мамлакатга ноқонуний кирганлар Қирғизистон қонунчилигига мувофиқ жавобгарликка тортилиши ҳақида эслатиб ўтади.
Изоҳ (0)