Ўзбекистонда январь—апрель ойларида истеъмол нархлари ошиши 2,6 фоизни ташкил этди. Бу ҳақда Статистика агентлиги ҳисоботида маълум қилди. Апрель ойида истеъмол нархлари ўтган йилга нисбатан (0,82 фоиз) бир оз тезлашиб, 0,93 фоизни ташкил этган.
Маълумотларга кўра, апрель ойида озиқ-овқатлар 0,4 фоизга, ноозиқ-овқат маҳсулотлари 1 фоизга, пуллик хизматлар 1,8 фоизга қимматлашган. 2023 йилнинг апрель ойига нисбатан таққослаганда, ўтган 1 йилда озиқ-овқатлар нархи 7 фоизга, ноозиқ-овқатлар нархи 7,7 фоизга, хизматлар нархи 10,8 фоизга ошган.
Апрель ойида нархларнинг ўсиши бўйича мевалар (+3 фоиз) етакчи бўлди. Ой давомида банан 9,9 фоизга, мандарин 7,5 фоизга қимматлашган. Шу билан бирга, сут маҳсулотлари 2,7 фоизга, сабзавотлар 1,2 фоизга арзонлашган.
Апрель охирларида Марказий банк базавий инфляция сезиларли секинлашиб, март ойида йиллик 7,6 фоиз ва йил бошидан умумий инфляция даражасидан пастроқ шаклланганини маълум қилганди.
Регулятор 2023 йил якуни бўйича инфляция даражаси 8,5–9,5 фоиз атрофида бўлишини прогноз қилган ва йил якунида йиллик инфляция 8,77 фоиз даражасида қайд этилганди. 2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Изоҳ (0)