Россия 2024 йил августидан бошлаб ҳибсга олинганларни урушга жўнатгани учун полиция ходимларига мукофот пули тўлаб келмоқда. Бу ҳақда “Верстка” нашри хабар берди.
Мудофаа вазирлиги билан шартнома тузган ҳар бир ушланганлар учун полициячиларга — участка нозирлари, тезкор ходимлар ва терговчиларга пул берилган. Жиноятда гумонланганларнинг қарийб 12 фоизи суд ва терговга қадар урушга кетмоқда.
Энди биз гумонланувчиларга ҳуқуқларини тушунтираётганда, улар адвокат билан шартнома тузиши мумкинлигини ҳам, албатта, тушунтиришимиз керак. Бу суҳбат мажбурий, деди Краснодардан бўлган полициячи нашрга.
Тўловлар миқдори ҳар бир ушланган шахс учун 10 мингдан 100 минг рублгача ўзгариб туради. Санкт Петербург ва Москвада урушга юборилган гумонланувчи учун полициячи 50 минг рубль, Ленинград вилоятида эса 100 минг рубль олишини собиқ терговчи маълум қилди.
Агар қўлга олинган шахс урушга боришга рози бўлса, жиноят иши юритилиши тўхтатилади, эҳтиёт чораси бекор қилинади. Адвокатларнинг айтишича, агар айбланувчи урушдан мукофот билан қайтса, жароҳат олса ёки қайтиб келмаса, судланганлик ҳақидаги ёзувлар бўлмайди.
“Ойига икки кишини урушга юборган терговчи ўз маошидан кўпроқ пул олади”.
Урушга кетган гумонланувчидан ҳеч қандай компенсация талаб қилиб бўлмайди. Фуқаролик даъволари эса фақат уруш тугаганидан кейин ва агар жавобгар тирик бўлса, кўриб чиқилади, деб маълум қилган федерал судья.
Мукофотни олиш учун ҳарбий комиссариатдан гумонланувчи шартнома имзолагани ҳақида маълумотнома олиб келиш керак. Шу билан бирга, судьянинг айбланувчи урушга кетгани сабабли иш ёпилди, деган қарори ҳам яроқли ҳисобланади.
Амалда, ойига икки кишини юбориш орқали терговчи ўз маошидан кўпроқ даромад олади, дея таъкидлаган яқинда ишдан кетган полициячи.
Июнь ойида 3333 нафар ҳибсга олинган шахсга урушга бориш таклиф этилган.
Жиноят кодексига киритилган ўзгартиришлардан сўнг, 18 ёшдан катта ва 65 ёшдан кичик бўлган барча ушлаб турилганларга суд ўрнига жанговар ҳаракатларда қатнашиш ҳуқуқи ҳам борлиги тушунтирилмоқда.
ИИВнинг полиция ходимлари орасидаги манбалардан олинган маълумотларга кўра, биргина июнь ойининг ўзида бутун мамлакат бўйлаб 3333 нафар ҳибсга олинган шахсга урушга бориш таклиф этилган. Шундан 2200 киши шартнома тузишни рад этган, 392 нафари (қарийб 12 фоиз) рози бўлган. Тезкор ходимлар шартнома тузишни таклиф қилган яна 741 киши бўйича натижа номаълум.
Изоҳ (0)