Аргентинада ҳарбий тўнтариш даврида тутқун онасидан мажбуран тортиб олинган чақалоқ 48 йилдан сўнг топилди. Бу ҳақда BBC хабар берди.
Бегоналарнинг қўлида тарбия топган эркакнинг шахсига ДНК тести орқали аниқлик киритилган. Эркакнинг синглиси Адриана Мецнинг айтишича, у узоқ йиллар давомида йўқолган укасини қидирган. Ўтган ҳафта опа-ука илк бор кўришиб, гаплашган.
Мец укасини топишда Plaza de Mayo гуруҳи ёрдамига таянган. Бу ташкилот узоқ вақтдан бери ҳарбий хунта томонидан ўғирланган тахминан 500 нафар чақалоқни оилалари билан бирлаштиришга уринади. Метзнинг укаси эса топилган бир юз қирқинчи чақалоқ саналади. Унинг исми хавфсизлик мақсадида ошкор этилмаган.
Ташкилот “140-набира” деб атаган эркак ташкилот кўрсатувида иштирок этмаган бўлса-да, унинг оиласидан қандай ажралиб қолгани ҳақида батафсил маълумот берилган. Эркакнинг ота-онаси Буэнос Айрес провинциясидаги Баия Бланка шаҳрида сиёсий фаол бўлиб фаолият юритган.
Унинг отаси Рауль Мец ўз отасининг изидан бориб, темирйўл соҳасида ишлаган. Шу билан бирга коммунистик партиянинг фаол аъзоси бўлган. Унинг онаси Граcиэла Ромеро эса иқтисод бўйича таҳсил олган ва Марксист партизан гуруҳи PRТ-ERP’га қўшилган.
Жуфтликнинг Адриана исмли қизи бор эди. Граcиэла Ромеро 1976 йил декабрь ойида ўз уйида ҳибсга олинганида иккинчи фарзандига беш ойлик ҳомиладор бўлган.
1976 йил март ойида ҳарбий хунта тўнтариш ўтказиб, ўз ҳукмронлигига қарши ҳар қандай мухолифатни йўқ қилишга ҳаракат қилган. Ўн минглаб кишилар рейдларда қўлга олиниб, махфий ҳибсхоналарда сақланган. Кўпчилик қийноққа солинган. Граcиэла Ромеро 1977 йил 17 апрелда La Escuelita (Кичик мактаб) деб номланувчи яширин ҳибсхонада асирликда ўғил фарзанд дунёга келтирган. Ҳисоб-китобларига кўра, 1976-1983 йиллар давомида ҳарбий тўнтаришда 30 000 га яқин одам ҳалок бўлган.
Изоҳ (0)