Гўзаллик танловлари нафақат ташқи кўриниш ва нафисликни баҳолаш, балки инсонларнинг иродаси, билим ва жамиятга фойдали ишларга ҳисса қўшиш қобилиятини ҳам намойиш этади. Қуйида тарихда илк бор ўз мамлакатини “Дунё гўзали” каби нуфузли мусобақада ғалабага олиб чиққан аёллар ҳақида сўз боради.
Ҳиндистоннинг Ҳайдаробод шаҳрида “Дунё гўзали-2025” танлови финали бўлиб ўтди. Гўзаллик унвони Опал Сучату Чуангстрига насиб этди. Шу тариқа биринчи марта таиландлик қиз дунёдаги энг гўзал қизга айланди.
Опал Сучата Чуангсри ким?
Таиландлик Опал Сучата Чуангсри Пхукет оролида туғилган. Унинг ота-онаси меҳмонхона бизнеси билан шуғулланади. Ҳозирда Опал учта соҳада фаолият юритмоқда: у модел бўлиб ишлайди, шу билан бирга, Тҳаммасат университетининг Сиёсатшунослик факультетида таҳсил олади. Ўқиши туфайли у инглиз ва хитой тилларини ўрганган, шунингдек, гўзаллик танловларида билим билан боғлиқ саволларга осонлик билан жавоб бера олади.
Опал Сучата Чуангсри 2025 йилда “Дунё гўзали” танловининг ғолибаси сифатида машҳур бўлди. У 16 ёшида кўкрак саратони сабаб операция бўлган. Реабилитациядан сўнг, у ўзига ўхшаган соғлиқ муаммолари билан юзлашган аёлларга ёрдам беришни бошлаган, тез-тез шифохоналар ва реабилитация марказларига боради. У Оpal for Her компаниясини ташкил қилган. Бу компания аёлларга кўкракдаги янги ўсма белгиларини вақтида аниқлашни ўргатиб, аёллар саломатлиги бўйича хабардорликни оширишга хизмат қилади.
“Дунё гўзали” — 2018, мексикалик Ванесса Понс
Ванесса Понс де Леон Мексикадан чиққан биринчи “Дунё гўзали” унвони эгаси бўлди, бу воқеа 2018 йилда юз берди. Ғолиб 26 ёш эди. У Гуанахуато шаҳрида туғилиб ўсган, айнан шу ерда ўқишни бошлаган ҳамда моделлик фаолиятини бир вақтда олиб борган.
Ванессанинг таълим йўналиши иқтисодиёт бўлиб, у Гуанахуато университетида халқаро бизнес бўйича диплом олган. Шу билан бирга, у Мексиканинг моделлик агентликларида ҳам муваффақият қозонган, Мexicoʼs Next Top Model реалити-шоусида қатнашган ва кейин мамлакатдаги асосий гўзаллик танловига йўл олган.
“Дунё гўзали” — 2015, испаниялик Мирея Лалагуна
Ишониш қийин бўлса-да, Испания ўз вакилининг “Дунё гўзали” унвонини биринчи бор фақат 2015 йилда олгани билан фахрланиши мумкин. Ўшанда Мирея Лалагуна тожни бошига кийди. У Каталония ҳудудида туғилган бўлиб, ғолиб бўлган пайтда 23 ёшда эди. Мирея Барселона университетида фармацевтика бўйича бакалавр ва магистрлик даражасини олган эди.
“Дунё гўзали” фақат гўзаллик танлови эмас. Мен аёллар элчиси бўлишни хоҳлайман ва дунёга гўзаллик фақат ташқи кўриниш эмаслигини кўрсатиш имкониятига эга бўлишни истайман, дейди Лалагуна.
Изоҳ (0)