Ўзбекистонда жорий йил 1 августдан чиқинди хизматларидан қарздорлар учун электр тўловига чеклов кучга ўрнатилади. Бу тартиб чиқиндилар учун тўлов интизомини кучайтиришга доир қонунда белгиланган.
Қонунга асосан, ҳар ойнинг 3-санасигача чиқинди хизматидан қарздорлар тўғрисидаги маълумотлар “Ҳудудий электр тармоқлари” АЖ биллинг тизимига узатилади. Сўнгра қарздор истеъмолчиларга ҳар ойнинг 5-санасигача хабарнома юборилади. Огоҳлантириш юборилганидан сўнг, қарздорликни бартараф этишга беш кун муддат берилади.
Мавжуд қарздорлик ушбу муддат ичида тўланиши лозим. Акс ҳолда электр энергияси учун тўлов қилиш имконияти вақтинчалик чекланади. Қарздорлик бартараф этилиши билан чеклов автоматик олиб ташланади.
Мазкур тартиб 2025 йил 1 июлдан кейинги чиқинди хизматларидан шаклланган қарздорликлар учун жорий этилади.
Ҳукумат порталида ёзилишича, санитар тозалаш корхоналари чиқинди тўловларини ҳисоблашда аниқлик ва ҳаққонийлик учун жавобгар. Истеъмолчиларга ўз вақтида ва сифатли хизмат кўрсатилмаган кунлардаги тўловлар қайта ҳисоб-китоб қилинади.
Изоҳ (0)