Португалия терма жамоаси Миллатлар Лигаси финалида Испанияни мағлуб этиб, бош совринга эга чиқди. Мазкур ғалаба таркибдаги 4 нафар футболчи учун 2024/25 йилги мавсум бошидан бери 5-соврин ҳисобланади.
Бунга қадар Нуну Мендеш, Жаоу Невеш, Витиня ва Гонсалу Рамуш каби футболчилар Парижнинг “ПСЖ” клуби таркибида 4 та соврин қўлга киритган эди.
Аввалроқ улар “ПСЖ” сафида қуйидаги совринларни қўлга киритган эди:
- Чемпионлар Лигаси;
- Франция чемпионати;
- Франция кубоги;
- Франция Суперкубоги.
Шунингдек, Нуну Мендеш финалнинг энг яхши ўйинчиси деб топилди. Ҳимоячи Испанияга қарши баҳсда бир гол муаллифига айланди, шунингдек, пенальтилар сериясида ҳам ўз зарбасини аниқ амалга оширди.
Маълумот учун, Португалия Миллатлар Лигаси финалида Испанияни пенальтилар сериясида мағлуб этди (асосий ва қўшимча бўлимлар — 2:2).
“ПСЖ” Франция чемпионатида 84 очко билан биринчи ўринни эгаллаган бўлса, мамлакат кубоги финалида “Реймс”ни 3:0, Суперкубок баҳсида “Марсель”ни 1:0 ҳисобида мағлуб этди. Парижликлар Чемпионлар Лигаси ҳал қилувчи учрашувида “Интер”дан 5:0 ҳисобида устун келиб, бош совринга эга чиқди.
Изоҳ (0)