“Барселона” клуби “Арсенал” ярим ҳимоячиси Томас Парти трансфери бўйича музокара олиб бормоқда. Бу ҳақда The Sun нашри хабар берди.
Каталонияликлар 31 ёшли ганалик футболчини эркин агент сифатида таркибга қўшиб олишга ҳаракат қилмоқда. “Кўк-анорранглилар” аллақачон Партининг атрофидаги шахсларга алоқага чиққан. Унинг “Арсенал” билан амалдаги шартномаси июнь ойи охирида якунланади.
“Барселона” бош мураббийи Ҳанси-Дитер Флик Томас Партининг ўйинларини ёқтиради, шу боис уни катта харажатларсиз таркибга жалб қилиб, жамоасининг ярим ҳимоя чизиғидаги ўйинларини янада кучайтиришни истамоқда.
Футболчига Саудия Арабистонининг бир нечта клублари ҳам қизиқиш билдирмоқда, бироқ Томас Осиё қитъасига кетишга шошилмаяпти.
Парти учун Ла Лига бегона эмас. У “Мальорка”, “Алмерия” ва “Атлетико” каби жамоалар шарафини ҳимоя қилган.
Томас Парти 2020 йилдан бери “Арсенал” сафида ҳаракат қилиб келмоқда. У жорий Англия Премьер Лигаси доирасидаги 35 та ўйинда майдонга тушиб, ўз ҳисобига 4 та гол ва 2 та голли узатма ёздириб қўйган. Transfermarkt портали ярим ҳимоячининг қийматини 14 миллион еврога баҳоламоқда.
Изоҳ (0)