13 ноябрь куни кечқурун Қирғизистондаги интернет фойдаланувчилари тармоқ ишлашида узилишларни кузата бошлаган. Қирғизистон Республикаси Рақамли ривожланиш вазирлигининг маълумотига кўра, бу ҳодисага ташқи интернет-провайдерлар линиясидаги носозлик сабаб бўлган.
“Шу муносабат билан айрим алоқа операторларида интернетга киришда вақтинчалик узилишлар юзага келиши мумкин. Мутахассислар барқарор уланишни имкон қадар тезроқ тиклаш учун барча чораларни кўрмоқда”, деб таъкидланган вазирликнинг расмий баёнотида.
Фойдаланувчиларнинг хабар беришича, муаммолар соат 20:30 дан сўнг бошланган. Улар интернетнинг секин ишлаши ёки умуман уланишнинг йўқлигидан шикоят қилишган.
Вазирлик фаол тиклаш ишлари олиб борилаётганини маълум қилди.
Интернетдаги узилишларга Қозоғистондаги ташқи интернет хизмат кўрсатувчи провайдерларнинг линиясида юз берган носозлик сабаб бўлгани аниқланмоқда.
Аввалроқ Қирғизистон Ички ишлар вазирлиги мамлакатда оммавий тартибсизликларни тайёрлаш ва ҳокимиятни зўравонлик билан эгаллашга уринган гуруҳнинг етти нафар аъзоси ҳибсга олинганини эълон қилди.
Изоҳ (0)