Ўзбекистон мусулмонлари идораси “Йил имоми-2024” танлови ғолибларини эълон қилди.
Идора матбуот хизматига кўра, 13 ноябрь куни Республика масжидларида фаолият юритаётган имом-хатиб ва ноиблар иштирокида “Йил имоми-2024” кўрик-танловининг якуний босқичи бўлиб ўтди. Унда Қорақалпоғистон Республикаси, вилоятлар ва Тошкент шаҳри босқичларида ғолибликни қўлга киритган 14 нафар имом домла ўзаро беллашди.
Мусобақа иштирокчилари Қуръони карим қироати ва тафсири, ақида, фиқҳ, Ислом тарихи, ҳадис илмлари, алломалар ижодига оид саволларга жавоб берди. Шунингдек, меҳнат фаолиятлари давомида амалга оширган салмоқли ишлари ва ОАВларида эълон қилинган ижодини намойиш этди. Қатнашчиларнинг чиқишлари ҳакамлар ҳайъати томонидан мезонлар асосида баҳоланди.
Танлов натижаларига кўра, қуйидаги иштирокчилар совринли ўринларга муносиб деб топилди:
- 1-ўрин – Наманган вилояти “Ҳомиддин қори” жоме масжиди имом-хатиби Муҳаммад Бобир Насриддиновга I даражали диплом ва Ҳаж сафари йўлланмаси;
- 2-ўрин – Тошкент шаҳридаги “Фирдавс” жоме масжиди имом-хатиби Бахтиёр Сатторовга II даражали диплом ва 16 миллион сўм пул мукофоти;
- 3-ўрин – Тошкент вилояти “Чаноқ” жоме масжиди имом-хатиби Ёқуб Бухарбаевга III даражали диплом ва 13 миллион сўм пул мукофоти топширилди.
-hT8rBb_m.jpg)
Шунингдек, танловнинг “Йилнинг энг фидоий имоми” Қорақалпоғистон Республикаси “Мулла Исҳоқ” жоме масжиди имом-хатиби Алтинбек домла Зинуллаев ва Хоразм вилояти “Мирҳошим бобо” жоме масжиди имом-хатиби Оллаберган Ғойиповга насиб этди.
2023 йилда ушбу танловда Тошкент шаҳридаги “Холид ибн Валид” жоме масжиди имом-хатиби Исроилжон домла Исмоилжонов биринчи ўринни олиб, унга диплом ва ҳаж сафари йўлланмаси берилганди.
Изоҳ (0)