Тошкент шаҳар ИИББ энергетика вазири шикоят аризаси бўйича Отабек Бакировга жиноят иши қўзғатишни рад этди. Бу ҳақда иқтисодчи, блогер ўзининг Telegram каналида маълум қилди.
Шикоят Бакировнинг Сағбон подстанцияси билан боғлиқ муаммо ҳақида ёзган пости билан боғлиқ эди. Вазир Жўрабек Мирзамаҳмудов органларга шикоят аризасини 2024 йил 10 октябрь куни тақдим этган. Унда пост мундарижасида ҳақорат ва обрўсизлантириш ҳолатлари мавжудлиги ва бу бўйича Отабек Бакировга нисбатан тегишли тартибда чора кўрилиши лозимлиги айтилган.
“Олмазор туманидаги Сағбон постанцияси шундай станцияки, Мирзамаҳмудовнинг энергетиклари зерикиб қолса ё трансформатор алмаштиришади ёки ремонт қилишади”, деб ёзганди постда Отабек Бакиров.
Шунингдек, вазирдан “Кремль ва Газпромдаги оғаларга оид вазифалардан бўшаб”, шахсан Сағбон подстанциясига келишни сўраган. “У ерда ё миллиардларни ўпириб турадиган қора ўпқон бор ё иккита туманнинг ювилмас қарғиши теккан”, деб ёзганди.
Пост 2023 йил 5 июнь куни, 1 йил-у 7 ой аввал ёзилган. Вазир органларга шикоят аризасини 2024 йил 10 октябрда, яъни бир йил-у 4 ой ўтиб тақдим этган. Жўрабек Мирзамаҳмудов аризасини “Лолазор” меҳмони бўлгач, 6 кун ўтиб қолдирган.
Бошқарма қарорига хусусан, АОКАнинг Энергетика вазири шикоят аризасида кўрсатилган важлар мавжуд эмаслиги ҳақида тегишли экспертиза хулосаси, шунингдек, шикоятга сабаб бўлган пост ёзилганига 1,5 йилдан кўп вақт ўтганлиги асос қилиб кўрсатилган.
“Ички ишлар органларига мазкур иш юзасидан ўтказилган тезкор суриштирув ва ҳаракатлар учун фуқаровий ташаккур билдираман”, деб ёзди Отабек Бакиров.
Изоҳ (1)
Зур. энергетика вазири халк учун ишламайди