Тожикистон, Ўзбекистон ва Туркманистон 2025 йилда Афғонистонга электр энергияси етказиб беради. Бу ҳақда Афғонистон электр таъминоти компаниясига ((Da Afghanistan Breshna Sherkat — DABS) таяниб Ariana News хабар берди.
17 декабрь куни DABS бош директори вазифасини бажарувчи Абдул Бари Умар ва “Ўзэнергосотиш” компанияси бошқаруви раиси Жаҳонгир Обиджонов Афғонистонга энергия етказиб беришни 2025 йил охиригача узайтириш тўғрисидаги битимни имзолади. Етказиб бериш ҳажми ва қиймати, шунингдек, битимларнинг бошқа тафсилотлари ошкор этилмаган.
“Толибон” Туркманистон билан 7 декабрь куни, Тожикистон билан эса ноябрь ойи охирида шунга ўхшаш келишувни имзолаганди. Афғонистон Энергетика ва сув ресурслари вазирлигига кўра, ҳозирда мамлакатнинг электр энергиясига бўлган талаби кунига 1500 МВт ни ташкил этади. Шундан 720 МВт га яқини импорт қилинади, қолган қисми Афғонистон ичида ишлаб чиқарилади.
Афғонистон электр энергиясининг асосий қисмини Эрон, Ўзбекистон ва Туркманистондан импорт қилади. Эроннинг импорт қилинадиган электр энергияси кўпинча техник муаммолар туфайли узилишга учрайди. 15 декабрь куни Ўзбекистондан Афғонистонда электр энергияси техник муаммолар, Туркманистондан эса бўронлар туфайли узилгани маълум бўлганди.
Изоҳ (0)