Ўзбекистон Жаҳон банки гуруҳи кўмагида Хоразм вилоятида янги қуёш электр станциясини ишга туширади, деб хабар бермоқда банк матбуот хизмати.
Маълум қилинишича, Жаҳон банки Ўзбекистон учун банк кафолати кўринишидаги 3,5 миллион долларлик молиялаштиришни маъқуллади. Ушбу кафолат “Ўзбекистон миллий электр тармоқлари” АЖ давлат компаниясининг қуввати 100 МВт бўлган янги қуёш электр станциясида ишлаб чиқариладиган электр энергиясини харид қилиш бўйича тўлов мажбуриятларини ўз вақтида бажарилишини таъминлайди.
Хоразм вилоятидаги ушбу объектни қуриш ва эксплуатация қилиш билан Франциянинг Voltalia компанияси шуғулланади.
Қуёш электр станциясини 2025 йил ноябрь ойида ишга тушириш режалаштирилган. У 177 гектар майдонда жойлашган бўлиб, йилига 240 гигаватт-соатдан ортиқ қайта тикланувчи энергия ишлаб чиқаради. Унинг фаолияти йилига 230 минг тоннадан ортиқ карбонат ангидрид чиқиндиларини камайтириш ва 60 мингга яқин уй хўжаликларини тоза энергия билан таъминлаш имконини бериши кутилмоқда. Лойиҳа мамлакатнинг тоза энергия ишлаб чиқаришни кўпайтириш ва “яшил” иқтисодиётга ўтиш борасидаги саъй-ҳаракатларига салмоқли ҳисса қўшади.
“Жаҳон банки гуруҳи “Ўзбекистон-2030” стратегиясига мувофиқ Ўзбекистоннинг энергия бўйича эҳтиёжларини қондиришда ва 2030 йилга бориб қайта тикланадиган энергия манбаларини 25 ГВтга етказишда қўллаб-қувватлайди, бу эса ушбу ўн йилликнинг охирига келиб мамлакатда истеъмолдаги электр энергияси улушининг 40 фоизини ташкил этади,” дея таъкидлади Жаҳон банкининг Марказий Осиё бўйича минтақавий директори Татьяна Проскурякова.
2020 йилдан буён Жаҳон банки гуруҳига кирувчи Жаҳон банки ва Халқаро молия корпорацияси (IFC) Ўзбекистон ҳукуматининг 1000 МВт қуёш ва 500 МВт шамол энергияси қувватларини яратиш борасидаги саъй-ҳаракатларини қўллаб-қувватлаб келмоқда.
Хоразм вилоятидаги янги қуёш электр станцияси
2024 йилнинг февралида Шавкат Мирзиёевнинг Хоразм вилоятига ташрифи чоғида Тупроққалъа туманида Voltalia компанияси томонидан қуввати 100 мегаваттлик қуёш электр станцияси қурилишини бошлаш маросими бўлиб ўтганди. Бу Хоразмдаги илк шундай йирик лойиҳадир. Бу лойиҳа ишга тушса, Хоразм вилоятида электр энергияси ишлаб чиқариш қувватлари 30 фоизга ошиб, 424 мегаваттга етади. Хусусан, Тупроққалъа туманининг электрга бўлган йиллик 135 миллион киловатт соат талаби тўлиқ қондирилади.
Франциянинг Voltalia компанияси қайта тикланувчи энергетика соҳасидаги иншоотларни қуришда бой тажрибага эга. Ҳозирда дунёнинг 20 мамлакатида умумий қиймати 10 миллиард доллардан зиёд инвестиция лойиҳаларини амалга оширмоқда.
Изоҳ (0)