Ўзбекистонда 2025 йил 1 январдан умумий овқатланиш корхоналарига қўшилган қиймат солиғининг (ҚҚС) бир қисми кешбэк сифатида қайтариб берилади. Бу ҳақда 20 август куни президент Шавкат Мирзиёев тадбиркорлар билан учрашувда маълум қилди.
Мулоқотда президент умумий овқатланиш ҳамда меҳмонхона хизматларининг энг катта муаммоси ҚҚС ва ишчилар ҳисобини юритиш эканидан хабардорлигини таъкидлаган.
“Шу боис, 1 январдан умумий овқатланиш корхоналарига ҚҚСнинг бир қисми тадбиркорга кешбэк сифатида қайтариб берилади. Бунда ойлик айланмасининг 60 фоизини нақд пулсиз амалга оширган корхоналарга ҚҚСнинг 40 фоизи тўланган заҳоти қайтарилади. Агар нақд пулсиз айланма 60 фоиздан кам бўлса, кешбэк 20 фоиз бўлади”, деган давлат раҳбари.
Шу билан бирга, ҚҚС тўлашга ўтган ресторан ва кафеларга фойда солиғи 2 карра камаяди. 1 декабрдан бу корхоналар нақд пулга сотиб олган қишлоқ хўжалиги маҳсулотларини кирим қилишда ҳеч қандай ҳужжат талаб этилмайди. Уларга баҳор ва ёз мавсумида ўзларига туташ майдонларда стол-стул ва соябон қўйиб ишлашга рухсат берилади.
Ресторан ва кафелар ишчилар билан қисқа муддатли, соддалашган меҳнат шартномасини тузиши мумкин бўлади. Худди шу каби 1 октябрдан меҳмонхона ва туроператорларга ҳам тўланган ҚҚСнинг 20 фоизи кешбэк қилиб берилади.
Аввалроқ саноат ишлаб чиқарувчи корхоналарга электр ва газ истеъмоли лимитдан 20 фоизгача ошиб кетса ҳам базавий тариф сақланиб қолиши айтилганди. Бунда агар истеъмол 20 фоиздан ўтиб кетса, ошган қисмига тўлов 20 фоиз қимматлашиши эслатилган.
Изоҳ (0)